Injili ya toba ilihubiriwa katika Enzi ya Neema, na mradi tu mwanadamu aliamini, basi angekombolewa. Leo, badala ya ukombozi, kunazungumziwa tu ushindi na kufanywa kuwa timilifu. Haisemwi kamwe kwamba mtu mmoja akiamini, familia yake nzima itabarikiwa, au kwamba kuokolewa mara moja ni kuokolewa milele. Leo, hakuna mtu anayezungumza maneno haya, na vitu kama hivyo vimepitwa na wakati. Wakati huo, kazi ya Yesu ilikuwa kazi ya kuwakomboa binadamu wote. Dhambi za wote waliomwamini Yeye zilisamehewa; mradi tu ulimwamini Yeye, Angekukomboa; kama ulimwamini Yeye, hukuwa tena wa dhambi, uliondolewa dhambi zako. Hii ndiyo ilikuwa maana ya kukombolewa, na kuhesabiwa haki kwa imani. Hata hivyo, ndani ya wale walioamini, kulibaki kile ambacho kilikuwa cha uasi na kilichompinga Mungu, na ambacho bado ilibidi kiondolewe polepole. Ukombozi haukumaanisha kwamba mwanadamu alikuwa amepatwa na Yesu kabisa, bali kwamba mwanadamu hakuwa tena wa dhambi, kwamba alikuwa amesamehewa dhambi zake. Mradi tu ulimwamini Yeye, hungekuwa tena wa dhambi. Wakati huo, Yesu alifanya kazi nyingi ambayo haikueleweka kwa wanafunzi Wake na alisema mengi ambayo mwanadamu hakuelewa. Hii ni kwa sababu, wakati huo, Hakutoa maelezo yoyote. Kwa hivyo, miaka kadhaa baada ya Yeye kuondoka, Mathayo alitengeneza orodha ya nasaba ya Yesu, na wengine pia walifanya kazi nyingi ambayo ilikuwa ya mapenzi ya mwanadamu. Yesu hakuja kumfanya mwanadamu kuwa mtimilifu na kumpata, bali kufanya hatua moja ya kazi: kuileta injili ya ufalme wa mbinguni na kukamilisha kazi ya kusulubiwa. Na hivyo, punde tu Yesu aliposulubiwa, kazi Yake ilifika mwisho kamili. Lakini katika hatua ya sasa—kazi ya ushindi—maneno zaidi lazima yanenwe, kazi nyingi zaidi lazima ifanywe, na lazima kuwe na michakato mingi. Hivyo pia ni lazima mafumbo ya kazi ya Yesu na Yehova yafichuliwe, ili watu wote waweze kuwa na ufahamu na uwazi katika imani yao, kwa maana hii ni kazi ya siku za mwisho, na siku za mwisho ni hitimisho la kazi ya Mungu, wakati wa mwisho wa kazi. Hatua hii ya kazi itafanya kuwa wazi kabisa sheria ya Yehova na ukombozi wa Yesu, na kwa kiasi kikubwa ni ili uweze kuifahamu kazi nzima ya mpango wa usimamizi wa Mungu wa miaka elfu sita, na kufahamu umuhimu wote na kiini chote cha mpango huu wa usimamizi wa miaka elfu sita, na kufahamu madhumuni ya kazi yote iliyofanywa na Yesu na maneno aliyoyanena, na hata imani yako pofu na kuiabudu kwako Biblia. Yote haya hatua hii itakuwezesha kuyafahamu kikamilifu. Utakuja kuelewa kazi iliyofanywa na Yesu, na kazi ya Mungu leo; utaelewa na kuona ukweli wote, uzima wote, na njia yote. Katika hatua ya kazi iliyofanywa na Yesu, kwa nini Yesu aliondoka bila kufanya kazi ya kuhitimisha? Kwa sababu hatua ya kazi ya Yesu haikuwa kazi ya hitimisho. Aliposulubiwa msalabani, maneno Yake pia yalifika mwisho; baada ya kusulubiwa Kwake, kazi Yake ilimalizika kabisa. Haikuwa kama hatua ya sasa, ambapo kazi ya Mungu itakuwa imemalizika tu baada ya maneno kunenwa mpaka mwisho na kazi Yake nzima kuhitimishwa. Wakati wa hatua ya kazi ya Yesu, kulikuwa na maneno mengi ambayo hayakunenwa, au ambayo hayakuelezwa kikamilifu. Hata hivyo, Yesu hakujali kama maneno Yake yalikuwa yameonyeshwa kikamilifu, kwa kuwa huduma Yake haikuwa huduma ya maneno, na hivyo baada ya Yeye kusulubiwa msalabani, Aliondoka. Hatua hiyo ya kazi ilikuwa hasa kwa ajili ya kusulubiwa, na ni tofauti na hatua ya sasa. Hatua hii ya sasa ya kazi kimsingi ni kwa ajili ya kuhitimisha, kusafisha, na kufikisha kazi yote tamati. Maneno yasiponenwa hadi mwisho wake kabisa, haitawezekana kumaliza kazi hii, kwa kuwa katika hatua hii ya kazi, kazi yote inafikishwa mwisho na kufanikishwa kutumia maneno. Wakati huo, Yesu alifanya kazi nyingi ambayo haikueleweka kwa mwanadamu. Aliondoka kimyakimya, na leo bado kuna wengi wasioyafahamu maneno Yake. Ufahamu wao ni potofu lakini bado wanaamini kwamba ni sahihi, na hawajui kwamba wamekosea. Hatua ya mwisho itaifikisha kazi ya Mungu kwenye mwisho kamili na itatoa hitimisho lake. Wote watakuja kuufahamu na kuujua mpango wa usimamizi wa Mungu. Dhana zilizo ndani ya mwanadamu, nia zake, ufahamu wake potofu, dhana zake kuhusu kazi ya Yehova na Yesu, maoni yake kuhusu watu wasio na dini, na upotofu wake mwingine wote, mambo haya yote yatarekebishwa. Na mwanadamu atazifahamu njia zote sahihi maishani, na kazi yote iliyofanywa na Mungu, na ukweli wote. Hilo litakapotendeka, hatua hii ya kazi itafikia kikomo. Kazi ya Yehova ilikuwa uumbaji wa ulimwengu, ilikuwa mwanzo; hatua hii ya kazi ndiyo mwisho wa kazi, na ni hitimisho. Hapo mwanzoni, kazi ya Mungu ilitekelezwa miongoni mwa watu wateule wa Israeli, na ilikuwa kazi ya uanzilishi katika mahali patakatifu kabisa kati ya mahali pote. Hatua ya mwisho ya kazi inatekelezwa katika nchi chafu kabisa kuliko zote, kuihukumu dunia na kuhitimisha enzi. Katika hatua ya kwanza, kazi ya Mungu ilifanywa katika mahali penye mwangaza zaidi ya mahali pengine popote, na hatua ya mwisho inatekelezwa katika mahali penye giza zaidi ya mahali pengine popote, na giza hili litaondoshwa, mwanga utaletwa, na watu wote watashindwa. Wakati watu wa mahali hapa pachafu kabisa na penye giza kabisa kuliko pahali pote watakapokuwa wameshindwa, na watu wote watakapokuwa wamekubali kwamba kuna Mungu, ambaye ni Mungu wa kweli, na kila mtu atakuwa amesadikishwa kabisa, basi ukweli huu utatumiwa kutekeleza kazi ya kuushinda ulimwengu mzima. Hatua hii ya kazi ni ya uwakilishi. Punde tu kazi ya enzi hii itakapokamilika, kazi ya miaka elfu sita ya usimamizi itafikia mwisho kamili. Punde tu wale walio katika mahali penye giza kabisa watakapokuwa wameshindwa, bila shaka itakuwa hivyo pia kila mahali pengine. Kwa hivyo, ni kazi ya ushindi nchini China pekee ndiyo inayobeba umuhimu wa uwakilishi. China ni mfano halisi wa nguvu zote za giza, na watu wa China wanawakilisha wale wote ambao ni wa mwili, wa Shetani, na wanaoishi maisha yanayoelekezwa na mwili. Ni watu wa China ndio ambao wamepotoshwa kabisa na joka kubwa jekundu, ambao wana upinzani mkali kabisa dhidi ya Mungu, ambao ubinadamu wao ni duni kabisa na mchafu kabisa, na kwa hivyo wao ni kielelezo asili cha wanadamu wote wapotovu. Hili si kusema kwamba nchi nyingine hazina matatizo kabisa; dhana za mwanadamu ni sawa zote, na ingawa watu wa nchi hizi wanaweza kuwa na ubora mzuri wa tabia, kama hawamjui Mungu, basi lazima iwe kwamba wanampinga Yeye. Kwa nini Wayahudi pia walimpinga na kuasi dhidi ya Mungu? Kwa nini Mafarisayo pia walimpinga Yeye? Kwa nini Yuda alimsaliti Yesu? Wakati huo, wengi wa wanafunzi hawakumjua Yesu. Kwa nini, baada ya Yesu kusulubiwa na kufufuka tena, mwanadamu bado hakumwamini Yeye? Je, si uasi wote wa mwanadamu ni sawa? Ni kwamba tu watu wa China wanafanywa kuwa mfano, na watakaposhindwa watakuwa mifano na vielelezo, na watatumika kama marejeleo kwa wengine. Kwa nini Mimi daima Nimesema kwamba ninyi ni nyongeza kwa mpango Wangu wa usimamizi? Ni katika watu wa China ndipo upotovu, uchafu, udhalimu, upinzani, na uasi vinadhihirishwa kikamilifu zaidi na kufunuliwa katika namna zao zote mbalimbali. Kwa upande mmoja, wana ubora duni wa tabia, na kwa upande mwingine, maisha yao na fikira zao ni za nyuma, na mazoea yao, mazingira ya kijamii, familia ya kuzaliwa—yote ni duni na ya nyuma kabisa. Hadhi yao, pia, ni ya chini. Kazi katika mahali hapa ni ya uwakilishi, na baada ya kazi hii ya majaribio kutekelezwa kwa ukamilifu wake, kazi ya Mungu inayofuata itakuwa rahisi zaidi. Hatua hii ya kazi itakapokamilika, kazi inayofuata haitakuwa ngumu hata kidogo. Punde tu hatua hii ya kazi itakapotimizwa, mafanikio makubwa yatakuwa yamefikiwa kikamilifu, na kazi ya ushindi katika ulimwengu mzima itakuwa imefikia mwisho kamili. Kwa kweli, punde tu kazi miongoni mwenu itakapokuwa imefanikiwa, hii itakuwa sawa na mafanikio katika ulimwengu mzima. Huu ndio umuhimu wa sababu Yangu kuwafanya ninyi muwe kama mfano na kielelezo. Ndani ya watu hawa kuna uasi wowote unaoweza kuwepo, upinzani wowote unaoweza kuwepo, uchafu wowote unaoweza kuwepo, udhalimu wowote unaoweza kuwepo—uasi wote wa binadamu unawakilishwa ndani yao. Wao si watu wa kawaida kweli. Hivyo, wanachukuliwa kama mfano halisi wa ushindi, na punde tu watakaposhindwa bila shaka watakuwa vielelezo na mifano kwa wengine. Hakuna kilichokuwa cha uwakilishi zaidi kuliko hatua ya kwanza kutekelezwa katika Israeli. Waisraeli walikuwa safi kabisa na wenye kiasi kidogo kabisa cha upotovu kati ya binadamu wote, na hivyo kufanya kazi hiyo ya uanzilishi katika nchi hii kulikuwa na umuhimu mkubwa kabisa. Inaweza kusemwa kwamba mababu wa binadamu walitoka Israeli, na kwamba Israeli ilikuwa mahali pa kuzaliwa kwa kazi ya Mungu. Hapo mwanzo, watu hawa walikuwa safi kabisa, na wote walimwabudu Yehova, na kazi ya Mungu juu yao iliweza kufikia matokeo bora kabisa. Biblia nzima inarekodi kazi ya enzi mbili: Moja ilikuwa kazi ya Enzi ya Sheria, na moja ilikuwa kazi ya Enzi ya Neema. Agano la Kale linarekodi maneno ya Yehova kwa Waisraeli na kazi Yake katika Israeli; Agano Jipya linarekodi kazi ya Yesu huko Yudea. Lakini kwa nini Biblia haina majina yoyote ya Kichina? Kwa sababu sehemu mbili za kwanza za kazi ya Mungu zilitekelezwa katika Israeli, kwa sababu watu wa Israeli walikuwa wateule—yaani wao walikuwa wa kwanza kukubali kazi ya Yehova. Walikuwa wenye kiasi kidogo kabisa cha upotovu kati ya binadamu wote, na hapo mwanzo, walikuwa na mioyo iliyomtazamia Mungu, na pia walikuwa na mioyo imwogopayo Mungu. Walitii maneno ya Yehova, na daima walihudumu hekaluni, na walivalia kanzu au taji za kikuhani. Walikuwa watu wa kwanza kabisa kumwabudu Mungu, na walengwa wa kwanza kabisa wa kazi Yake. Watu hawa walikuwa vielelezo na mifano kwa binadamu wote. Walikuwa vielelezo na mifano ya usafi, ya watu wenye haki. Watu kama Ayubu, Ibrahimu, Lutu, Petro, au Timotheo—wote walikuwa Waisraeli, na vielelezo na mifano safi kabisa. Israeli lilikuwa taifa la kwanza kabisa kumwabudu Mungu miongoni mwa binadamu, na watu wengi zaidi wenye haki walitoka hapa kuliko mahali pengine popote. Mungu alifanya kazi juu yao ili Aweze kuwasimamia vizuri zaidi binadamu duniani kote katika siku zijazo. Matendo yao na vitendo vya haki walivyofanya katika kumwabudu Yehova vilirekodiwa, ili viweze kutumika kama vielelezo na mifano kwa watu walio nje ya Israeli wakati wa Enzi ya Neema; na vitendo vyao vimetumika kutegemeza miaka elfu kadhaa ya kazi, mpaka hivi leo.

Baada ya kuanzishwa kwa dunia, hatua ya kwanza ya kazi ya Mungu ilitekelezwa katika Israeli, na hivyo Israeli ilikuwa mahali pa kuzaliwa kwa kazi ya Mungu duniani, na kituo cha kazi ya Mungu duniani. Upeo wa kazi ya Yesu ulienea katika Yudea nzima. Wakati wa kazi Yake, wachache sana kati ya wale waliokuwa nje ya Yudea walijua kuihusu, kwa kuwa Hakufanya kazi yoyote nje ya Yudea. Leo, kazi ya Mungu imeletwa nchini China, na inatekelezwa ndani ya upeo huu tu. Wakati wa awamu hii, hakuna kazi inayozinduliwa nje ya China; kuenea kwake nje ya China ni kazi ambayo itakuja baadaye. Hatua hii ya kazi inafuatia hatua ya kazi ya Yesu. Yesu alifanya kazi ya ukombozi, na hatua hii ni kazi inayofuatia kazi hiyo; kazi ya ukombozi imekamilika, na katika hatua hii hakuna haja ya kutungwa mimba na Roho Mtakatifu, kwa sababu hatua hii ya kazi ni tofauti na hatua iliyopita, na kwa sababu China ni tofauti hata zaidi na Israeli. Yesu alifanya hatua moja ya kazi—kazi ya ukombozi. Mwanadamu alimwona Yesu, na muda mfupi baadaye, kazi Yake ilianza kuenea kwa watu wa mataifa. Leo, kuna wengi wanaomwamini Mungu huko Marekani, Uingereza, na Urusi, hivyo kwa nini kuna watu wachache zaidi wanaoamini nchini China? Kwa sababu China ni nchi iliyofungwa zaidi. Kwa hivyo, China ilikuwa ya mwisho kukubali njia ya Mungu, na hata sasa imekuwa chini ya miaka mia moja tangu ilipofanya hivyo—baadaye sana kuliko Marekani na Uingereza. Hatua ya mwisho ya kazi ya Mungu inatekelezwa katika nchi ya China ili kuhitimisha kazi Yake, na ili kazi Yake yote iweze kukamilishwa. Watu katika Israeli wote walimwita Yehova Bwana wao. Wakati huo, walimwona kama kichwa cha familia yao, na Israeli nzima ikawa familia kubwa ambamo kila mtu alimwabudu Bwana wao Yehova. Roho wa Yehova mara nyingi aliwatokea, na Yeye akanena na kutamka sauti Yake kwao, na kuyaongoza maisha yao kupitia nguzo ya wingu na sauti. Wakati huo, Roho alitoa mwongozo Wake katika Israeli moja kwa moja, akinena na kutamka sauti Yake kwa watu, nao waliona mawingu na walisikia sauti za ngurumo, na kwa namna hii Aliyaongoza maisha yao kwa maelfu kadhaa ya miaka. Hivyo, ni watu wa Israeli pekee ambao wamekuwa wakimwabudu Yehova daima. Wanaamini kwamba Yehova ni Mungu wao, na kwamba Yeye si Mungu wa watu wa mataifa. Hili si ajabu: Yehova, hata hivyo, alikuwa amefanya kazi miongoni mwao kwa karibu miaka elfu nne. Katika nchi ya China, baada ya maelfu ya miaka ya usingizi mzito, sasa tu ndipo wapotovu wamekuja kujua kwamba mbingu na ardhi na vitu vyote havikuundwa kiasili, bali vilifanywa na Muumba. Kwa sababu injili hii imetoka ng’ambo, wale wenye mawazo ya kikabaila, ya kupinga maendeleo wanaamini kwamba wale wote wanaoikubali injili hii ni wahaini, wao ni mbwa waliomsaliti Buddha, babu yao. Kuna hata wengi wa wenye mawazo haya ya kikabaila wanaouliza, “Watu wa China wanawezaje kumwamini Mungu wa wageni? Je, hawawasaliti mababu zao? Je, hawatendi maovu?” Leo, watu wamesahau kitambo kwamba Yehova ni Mungu wao. Wamemsukuma Muumba nyuma ya akili zao kitambo, na kwa hivyo wanaamini katika mageuzi, kumaanisha kwamba mwanadamu aligeuka kutoka kwa sokwe, na kwamba dunia ya asili ilitokea tu. Chakula chote kizuri kinachofurahiwa na binadamu hutolewa na asili, kuna sheria za uhai na kifo cha mwanadamu, na si kweli kabisa kwamba Mungu anatawala juu ya kila kitu. Kuna hata wakana Mungu wengi wanaoamini kwamba Mungu kutawala juu ya kila kitu ni ushirikina na si jambo la kisayansi. Lakini je, sayansi inaweza kuchukua nafasi ya kazi ya Mungu? Je, sayansi inaweza kutawala juu ya binadamu? Kuhubiri injili katika nchi inayotawaliwa na ukana Mungu si kazi rahisi, na inahusisha vikwazo vikubwa. Leo, je, si kuna wengi wanaompinga Mungu kwa namna hii?

Yesu alipokuja kufanya kazi Yake, watu wengi walilinganisha kazi Yake na kazi ya Yehova, na, walipopata kwamba hazilingani, walimsulubisha Yesu msalabani. Kwa nini hawakupata ulinganifu wowote kati ya kazi Yao? Ilikuwa, kwa upande mmoja, kwa sababu Yesu alifanya kazi mpya, na pia kwa sababu, kabla ya Yesu kuanza kazi Yake, hakuna mtu aliyekuwa ameandika “nasaba” Yake. Ingekuwa vizuri kama mtu angefanya hivyo—nani basi angemsulubisha Yesu msalabani? Kama Mathayo angaliandika nasaba ya Yesu miongo kadhaa mapema, basi Yesu asingalipitia mateso makubwa hivyo. Je, si ndivyo ilivyo? Punde tu watu wangeisoma nasaba ya Yesu—kwamba alikuwa mwana wa Ibrahimu, na mzao wa Daudi—basi hawangemtesa Yeye. Je, si jambo la kusikitisha kwamba nasaba Yake ilikawia mno kuandikwa? Na ni jambo la kusikitisha namna gani kwamba Biblia inarekodi tu hatua mbili za kazi ya Mungu: hatua moja ambayo ilikuwa kazi ya Enzi ya Sheria, na moja ambayo ilikuwa kazi ya Enzi ya Neema; hatua moja ambayo ilikuwa kazi ya Yehova, na moja ambayo ilikuwa kazi ya Yesu. Ingelikuwa bora zaidi namna gani kama nabii mmoja mkuu angelitabiri kazi ya leo. Kungelikuwa na sehemu ya ziada katika Biblia yenye mada “Kazi ya Siku za Mwisho”—je, hiyo isingelikuwa bora zaidi? Kwa nini mwanadamu akabiliwe na mateso mengi hivi leo? Ninyi mmekuwa na wakati mgumu sana! Kama kuna yeyote anayestahili kuchukiwa, ni Isaya na Danieli kwa kutotabiri kazi ya siku za mwisho, na kama kuna yeyote anayestahili kulaumiwa, ni mitume wa Agano Jipya ambao hawakuorodhesha nasaba ya Mungu mwenye mwili wa pili mapema. Jambo la kusikitisha lililoje! Ninyi mnalazimika kutafuta ushahidi kila mahali, na hata baada ya kupata vipande fulani vya maneno madogo bado hamjui kama vinalingana au la. Ni jambo la aibu lililoje! Kwa nini Mungu ni msiri sana katika kazi Yake? Leo, watu wengi bado hawajapata ushahidi thabiti, lakini pia hawawezi kuukana. Basi wanapaswa kufanya nini? Hawawezi kumfuata Mungu kwa uthabiti, lakini pia hawawezi kusonga mbele katika shaka kama hiyo. Na hivyo, “wasomi mahiri na wenye vipawa” wengi hukubali mtazamo wa “jaribu na uone” wanapomfuata Mungu. Hili ni tatizo gumu sana kushughulikia! Je, mambo yasingekuwa rahisi sana kama Mathayo, Marko, Luka, na Yohana wangeweza kutabiri siku za usoni? Ingalikuwa bora kama Yohana angaliona hali halisi ya maisha katika ufalme—ni jambo la kusikitisha sana kwamba yeye aliona tu maono na hakuona kazi halisi iliyofanikishwa duniani. Ni jambo la kusikitisha lililoje! Kuna shida gani na Mungu? Kwa nini, baada ya kazi Yake kwenda vizuri sana katika Israeli, sasa amekuja China, na, kwa nini Alipaswa kuwa mwili, na kufanya kazi na kuishi binafsi miongoni mwa wanadamu? Mungu hamfikirii mwanadamu kabisa! Siyo tu kwamba Hakuwaambia wanadamu mapema, bali ghafla Alileta kuadibu na hukumu Yake. Kwa kweli haileti maana! Mara ya kwanza Mungu alipopata mwili, Aliteseka dhiki nyingi kutokana na kutomwambia mwanadamu mapema kuhusu ukweli wote wa ndani. Hakika hawezi kuwa Amesahau hilo? Na hivyo kwa nini bado Hamwambii mwanadamu wakati huu? Leo, ni bahati mbaya iliyoje kwamba kuna vitabu sitini na sita tu katika Biblia. Kama kungekuwa na kimoja tu zaidi ambacho kilitabiri kazi ya siku za mwisho, hicho kingetosha! Je, hufikirii hivyo? Hata Yehova, Isaya, na Daudi hawakutaja kazi ya leo. Walikuwa mbali zaidi na wakati wa sasa, wametenganishwa kwa muda wa zaidi ya miaka elfu nne. Wala Yesu hakutabiri kikamilifu kazi ya leo, akizungumzia kidogo tu kuihusu, na bado mwanadamu hapati ushahidi wa kutosha. Ukilinganisha kazi ya leo na ya awali, zote mbili zinawezaje kulingana? Hatua ya kazi ya Yehova ilielekezwa kwa Israeli, hivyo ukilinganisha kazi ya leo na hiyo kutakuwa na kutolingana kwa kiasi kikubwa hata zaidi; hizo mbili haziwezi kulinganishwa kabisa. Wala wewe si wa Israeli, wala wewe si Myahudi; ubora wako wa tabia na kila kitu kinachokuhusu kina upungufu—unawezaje kujilinganisha nao? Je, hili linawezekana? Jua kwamba leo ni Enzi ya Ufalme, na ni tofauti na Enzi ya Sheria na Enzi ya Neema. Kwa hali yoyote, usijaribu kutumia fomula; Mungu hawezi kupatikana katika fomula yoyote kama hiyo.

Yesu aliishije katika kipindi cha miaka 29 baada ya kuzaliwa Kwake? Biblia haina kumbukumbu yoyote ya utoto na ujana Wake; unajua ulivyokuwa? Inawezekana kuwa Hakuwa na utoto au ujana, na kwamba Alipozaliwa alikuwa tayari na umri wa miaka 30? Unajua kidogo sana, hivyo usiwe mzembe sana katika kutoa maoni yako. Hakukupi faida yoyote! Biblia inarekodi tu kwamba kabla ya siku ya kuadhimisha kuzaliwa kwa Yesu ya miaka 30, Alibatizwa na kuongozwa na Roho Mtakatifu hadi jangwani ili kupitia kishawishi cha ibilisi. Na Injili Nne zinarekodi kazi Yake ya miaka mitatu na nusu. Hakuna rekodi ya utoto na ujana Wake, lakini hili halithibitishi kwamba Hakuwa na utoto na ujana; ni kwamba tu, mwanzoni, Hakufanya kazi yoyote, na Alikuwa mtu wa kawaida. Unaweza kusema, basi, kwamba Yesu aliishi kwa miaka 33 bila ujana au utoto? Inawezekana kwamba Alifika umri wa miaka 33 na nusu ghafla? Kila kitu ambacho mwanadamu anafikiria kumhusu Yeye ni cha kupita maumbile na kisicho halisi. Bila shaka, Mungu mwenye mwili ana ubinadamu wa kawaida, lakini Anapotekeleza kazi Yake ni moja kwa moja kupitia ubinadamu Wake usio kamili na uungu Wake kamili. Ni kwa sababu ya hili kwamba mwanadamu anachukua mtazamo wa shaka juu ya kazi ya leo, na hata juu ya kazi ya Yesu. Ingawa kazi ya Mungu inatofautiana kati ya nyakati mbili alizopata mwili, kiini Chake hakitofautiani kabisa. Bila shaka, ukisoma kumbukumbu za Injili Nne, tofauti ni kubwa. Unawezaje kurudi kwenye maisha ya Yesu wakati wa utoto na ujana Wake? Unawezaje kuufahamu ubinadamu wa kawaida wa Yesu? Pengine una ufahamu thabiti wa ubinadamu wa Mungu wa leo, lakini huuelewi ubinadamu wa Yesu, sembuse kuufahamu. Kama isingeandikwa na Mathayo, usingekuwa na fununu yoyote ya ubinadamu wa Yesu. Pengine, Ninapokuambia hadithi za Yesu wakati wa maisha Yake, na kukuambia ukweli kuhusu utoto na ujana wa Yesu, utatikisa kichwa chako na kusema, “Hapana! Hangeweza kuwa hivyo. Hawezi kuwa na udhaifu wowote, sembuse kuwa na ubinadamu wowote!” Hata utapaza sauti na kupiga yowe. Ni kwa sababu humwelewi Yesu ndiyo maana una dhana kunihusu Mimi. Unaamini Yesu kuwa mwenye uungu mno, kuwa hana chochote cha mwili kumhusu. Lakini ukweli bado ni ukweli, na hakuna mtu anayetaka kuzungumza kinyume na ukweli wa mambo, kwa maana Ninaponena ni kuhusiana na ukweli; si ubashiri, wala si utabiri. Jua kwamba Mungu anaweza kuinuka mpaka nafasi ya juu kabisa, lakini Ana uwezo hata zaidi wa kujificha katika vina vya chini kabisa. Yeye si kitu unachobuni katika akili yako—Yeye ni Mungu wa viumbe wote walioumbwa, si mungu binafsi aliyewaziwa na mtu mmoja mahususi.