Sura ya 70
Kwamba siri Zangu zinafichuliwa, zinadhihirishwa waziwazi, na hazijafichwa tena, ni kutokana kabisa na neema na rehema Yangu. Hata zaidi, kwamba neno Langu linaonekana miongoni mwa wanadamu, na halijafichwa tena, ni kwa sababu ya neema na rehema Yangu. Ninawapenda wote wanaojitumia kwa dhati kwa ajili Yangu na kujitoa Kwangu. Ninawachukia wote waliozaliwa kutoka Kwangu lakini ambao hawanijui Mimi, na hata wananipinga Mimi. Sitamtelekeza yeyote aliye kwa ajili Yangu kwa dhati; badala yake, Nitaongeza baraka za mtu huyo maradufu. Nitawaadhibu maradufu wale wanaouma mkono unaowalisha, na Sitawaacha waende zao kwa urahisi kabisa. Katika ufalme Wangu hakuna upotovu wala udanganyifu, na hakuna mambo ya kidunia; yaani, hakuna harufu ya wafu. Badala yake, yote ni unyofu na haki; yote ni usahili safi na uwazi, bila chochote kilichofichwa au kusitiriwa. Kila kitu ni kipya, kila kitu ni raha, na kila kitu ni ujenzi wa kiroho. Yeyote ambaye bado ananuka harufu ya wafu hawezi kwa vyovyote vile kubaki katika ufalme Wangu, na badala yake atatawaliwa na fimbo Yangu ya chuma. Siri zote zisizo na mwisho, tangu zamani za kale hadi wakati wa sasa, zinafichuliwa kikamilifu kwenu—kikundi cha watu wanaopatwa na Mimi katika siku za mwisho. Je, hamhisi kubarikiwa? Siku ambazo yote yanadhihirishwa waziwazi ni, hata zaidi, siku ambazo mnatawala mamlakani pamoja na Mimi.
Kundi la watu wanaotawala kwa kweli kama wafalme hutegemea kuamua Kwangu kabla na uteuzi Wangu, na hakuna mapenzi ya mwanadamu kabisa ndani yake. Yeyote anayethubutu kushiriki katika hili lazima apate pigo la mkono Wangu, na watu kama hao watakuwa walengwa wa moto Wangu ulao; huu ni upande mwingine wa haki na uadhama Wangu. Nimesema kwamba Ninatawala vitu vyote, Mimi ni Mungu mwenye hekima anayetumia mamlaka kamili, na Simwachi yeyote aende zake kwa urahisi; Mimi sionyeshi huruma kabisa, asiye na hisia za kibinafsi kabisa. Ninamtendea yeyote (haijalishi anazungumza vizuri kiasi gani, Sitamwacha aende zake) kwa haki, unyofu, na uadhama Wangu, huku Nikimwezesha kila mtu aone vyema zaidi maajabu ya matendo Yangu, pamoja na kile ambacho matendo Yangu yanahusu kwa kweli. Mmoja baada ya mwingine, Niliwaadhibu roho waovu kwa ajili ya matendo ya kila aina waliyofanya, Nikimtupa kila mmoja wao katika shimo lisilo na mwisho. Kazi hii Niliikamilisha kabla ya wakati kuanza, Nikiwaacha bila nafasi, Nikiwaacha bila mahali pa kufanya kazi yao. Hakuna hata mmoja wa watu Wangu wateule—wale walioamuliwa kabla na kuteuliwa na Mimi—anayeweza kupagawa na roho waovu, na badala yake watakuwa watakatifu daima. Kuhusu wale ambao Sijawaamua kabla na kuwateua, Nitawakabidhi kwa Shetani, na Sitaruhusu tena wabaki. Katika vipengele vyote, amri Zangu za utawala zinahusisha haki Yangu na uadhama Wangu. Sitamhurumia hata mmoja wa wale ambao Shetani anafanya kazi juu yao, bali Nitawatupa pamoja na miili yao Kuzimu, kwa maana Ninamchukia Shetani. Sitamhurumia kwa urahisi kwa vyovyote vile, bali Nitamwangamiza kabisa, bila kumpa fursa hata kidogo ya kufanya kazi yake. Wale ambao Shetani amewapotosha kwa kiwango fulani (yaani, wale ambao ni walengwa wa ole) wako chini ya mpango wa hekima wa mkono Wangu Mwenyewe. Msifikiri hili limetokea kutokana na ufidhuli wa Shetani; jueni kwamba Mimi ni Mwenyezi Mungu ambaye ni mtawala juu ya ulimwengu na vitu vyote! Kwangu Mimi, hakuna matatizo yasiyoweza kutatuliwa, na sembuse kuwepo na chochote kisichoweza kufanikishwa wala neno lolote lisiloweza kutamkwa. Binadamu hawapaswi kutenda kama washauri Wangu. Jihadharini msipigwe chini kwa mkono Wangu na kutupwa Kuzimu. Ninakwambia hili! Wale wanaoshirikiana na Mimi kwa kuchukua hatua leo ndio werevu zaidi, na wataepuka hasara na kuepushwa na maumivu ya hukumu. Hii yote ni mipango Yangu, iliyoamuliwa kabla na Mimi. Msitoe matamshi yasiyo ya busara na msizungumze kwa majivuno, mkifikiri ninyi ni wakuu sana. Je, haya yote si uamuzi Wangu kabla? Ninyi, ambao mngekuwa washauri Wangu, hamna aibu! Hamjui kimo chenu wenyewe; ni kidogo cha kusikitisha namna gani! Hata hivyo, mnafikiri hili si jambo kubwa, na hamjijui wenyewe. Muda baada ya muda, mnayazibia maneno Yangu sikio; ni ninyi ambao mmeshindwa kufikia nia Zangu zilizogharimu fikira nyingi, hamzichukulii hata kidogo kama neema na rehema Yangu, bali badala yake mnaonyesha uerevu wenu wenyewe mara kwa mara. Je, mnakumbuka hili? Watu wanaofikiri kuwa wao ni werevu sana ni sharti wapokee kuadibu gani? Mkiwa wasiojali na wasio waaminifu kwa maneno Yangu, kutoyachonga mioyoni mwenu, mnanitumia Mimi kama kisingizio cha kufanya hili na lile. Watenda maovu! Ni lini mtaweza kuujali kikamilifu moyo Wangu? Hamuujali hata kidogo, na kuwaita “watenda maovu” si kuwatendea vibaya. Linawafaa vizuri kabisa!
Leo Ninawaonyesha, kimoja baada ya kingine, vitu ambavyo wakati mmoja vilikuwa vimefichwa. Joka kubwa jekundu linatupwa katika shimo lisilo na mwisho na kuangamizwa kabisa, kwa maana kuliacha liwepo kusingekuwa na manufaa yoyote; hii inamaanisha haliwezi kumhudumia Kristo. Kuanzia sasa, vitu vyekundu havitakuwepo tena; polepole, lazima vipite hadi kufikia hatua ya kutokuwepo. Ninafanya kile Ninachosema; huu ni ukamilisho wa kazi Yangu. Ondoeni dhana za binadamu; kila kitu ambacho Nimesema, Nimefanya. Yeyote anayejaribu kuwa mwerevu anajiletea tu maangamizi na dharau, na hataki kuishi. Katika hali hiyo, Nitakuridhisha, na hakika Sitawaacha watu kama hao wawepo. Kuanzia sasa, ubora wa watu utaongezeka; wote wasioshirikiana na Mimi kwa kuchukua hatua wataondoshwa—kutupwa katika utupu. Wale ambao Nimewaona wanastahili ndio Nitakaowafanya kuwa watimilifu, na Sitamtupa hata mmoja. Hakuna ukinzani katika kile Ninachosema. Wale wasioshirikiana na Mimi kwa kuchukua hatua watapitia kuadibu zaidi, ingawa, hatimaye, hakika Nitawaokoa. Kufikia wakati huo, hata hivyo, kiwango cha uzima wao kitakuwa tofauti kabisa. Je, unataka kuwa mtu wa aina hiyo? Inuka na ushirikiane na Mimi! Hakika Sitamtendea vibaya yeyote anayejitumia kwa dhati kwa ajili Yangu, yeyote anayejitoa Kwangu kwa dhati. Nitakupa wewe baraka Zangu zote. Jitoe kikamilifu Kwangu! Kile unachokula, kile unachovaa, na mustakabali wako vyote viko mikononi Mwangu; Nitapanga haya yote ipasavyo, Nikikuruhusu ufurahie bila mwisho na uwe na ruzuku isiyokwisha. Hii ni kwa sababu Nimesema: “Wale miongoni mwenu mnaojitumia kwa dhati kwa ajili Yangu, hakika Nitawabariki sana.” Baraka zote zitamjia kila mtu anayejitumia kwa dhati kwa ajili Yangu.