Wale Watakaofanywa Kuwa Watimilifu Lazima Wapitie Usafishaji

Katika imani yako katika Mungu, lazima umtii Mungu, utie ukweli katika vitendo, na utimize wajibu wako wote. Zaidi ya hayo, lazima uelewe mambo unayopaswa kupitia. Ukipitia tu kupogolewa, kutiwa adabu, na kuhukumiwa, ikiwa unamfurahia Mungu tu lakini huwezi kuhisi Mungu anapokuwa anakutia adabu au kukupogoa—hili halikubaliki. Pengine katika usafishaji huu, unasimama imara, lakini hili bado halitoshi; lazima uendelee kusonga mbele. Somo la kumpenda Mungu halina mwisho; hakuna wakati ambapo litawahi kufika kikomo. Watu huona kumwamini Mungu kama jambo ambalo ni rahisi sana, lakini punde tu wanapolipitia kwa kweli, ndipo wanatambua kwamba imani katika Mungu si rahisi kama watu wanavyofikiria. Mungu anapofanya kazi ya kumsafisha mwanadamu, mwanadamu anateseka. Kadiri usafishaji wa mtu unavyokuwa mkubwa zaidi, ndivyo moyo wake umpendao Mungu utakavyokuwa mkubwa zaidi, na ndivyo nguvu kuu za Mungu zitakavyofunuliwa zaidi ndani yake. Kinyume chake, kadiri usafishaji wa mtu unavyokuwa mdogo zaidi, ndivyo moyo wake umpendao Mungu utakavyokuwa mdogo zaidi, na ndivyo nguvu kuu za Mungu zitakavyofunuliwa kwa kiasi kidogo zaidi ndani yake. Kadiri usafishaji na uchungu wa mtu unavyokuwa mkubwa na kadiri anavyopitia mateso zaidi, ndivyo upendo wake kwa Mungu utakavyozidi kuwa wa kina, ndivyo imani yake katika Mungu itakavyokuwa ya kweli zaidi, na ndivyo ufahamu wake wa Mungu utakavyokuwa wa kina zaidi. Katika upitiaji wako, utaona kwamba wale watu wanaopitia usafishaji na mateso makubwa, wanaopogolewa na kutiwa adabu sana, wana upendo wa kina kwa Mungu na ufahamu wa kina na kamili zaidi wa Mungu. Wale ambao hawajapitia kupogolewa wana ufahamu wa kijuujuu tu. Wanaweza tu kusema, “Mungu ni mwema sana, Anawapa watu neema ili waweze kumfurahia.” Ikiwa wamepitia kupogolewa na kutiwa adabu, basi wanaweza kuzungumza kuhusu ufahamu wa kweli wa Mungu. Kwa hivyo kadiri kazi ya Mungu kwa mwanadamu inavyokuwa ya ajabu zaidi, ndivyo inavyokuwa ya thamani na ya maana zaidi. Kadiri inavyokuwa isiyoweza kueleweka kwako na kadiri inavyokinzana na dhana zako, ndivyo kazi ya Mungu inavyoweza kukushinda, kukupata, na kukufanya kuwa mtimilifu. Umuhimu wa kazi ya Mungu ni mkuu jinsi gani! Mungu asingemsafisha mwanadamu kwa njia hii, Asingefanya kazi kulingana na mbinu hii, basi kazi Yake isingekuwa na matokeo na isingekuwa na maana. Hapo ndipo palipo na umuhimu wa kipekee wa kile kilichotajwa zamani—Mungu kulichagua na kulipata kundi hili, na kulifanya kuwa kamili katika siku za mwisho. Kadiri kazi Anayoitekeleza kwenu inavyokuwa kubwa, ndivyo upendo wenu kwa Mungu unavyokuwa wa kina na safi zaidi. Kadiri kazi ya Mungu inavyokuwa kubwa zaidi, ndivyo mwanadamu anavyoweza kufahamu kiasi fulani cha hekima Yake na ndivyo ufahamu wa mwanadamu Kwake unavyokuwa wa kina zaidi. Katika siku za mwisho, mpango wa usimamizi wa Mungu wa miaka elfu sita utafika kikomo. Je, unaweza kweli kuisha kwa urahisi? Punde tu Anapomshinda mwanadamu, je, kazi Yake itakuwa imekwisha? Je, inaweza kuwa rahisi hivyo? Watu wanafikiri kwamba ni rahisi sana, lakini kile ambacho Mungu anafanya si rahisi hivyo. Kila sehemu ya kazi ambayo Mungu anafanya ni isiyoweza kupimika kwa mwanadamu. Kama ungeweza kuielewa, basi kazi ya Mungu ingekuwa isiyo na maana au thamani. Kazi inayofanywa na Mungu ni isiyopimika; inakinzana mno na dhana zako, na kadiri inavyokinzana na dhana zako, ndivyo kazi ya Mungu inavyoonyeshwa kuwa ya maana zaidi; kama ingelingana na dhana zako, basi ingekuwa isiyo na maana. Leo, unahisi kwamba kazi ya Mungu ni ya ajabu sana, na kadiri unavyohisi zaidi kwamba ni ya ajabu, ndivyo unavyohisi zaidi kwamba Mungu hawezi kupimika, na unaona jinsi matendo ya Mungu yalivyo makuu. Angelifanya tu kazi fulani ya juu juu, ya kijuujuu tu ili kumshinda mwanadamu na Asingelifanya chochote kingine baadaye, basi mwanadamu asingeweza kuona umuhimu wa kazi ya Mungu. Ingawa unapitia usafishaji kidogo sasa, ni wa manufaa makubwa kwa ukuaji wako katika uzima; kwa hivyo ni muhimu sana kwenu kupitia mateso kama hayo. Leo, unapitia usafishaji kidogo, lakini baadaye utaweza kweli kuona matendo ya Mungu, na hatimaye utasema, “Matendo ya Mungu ni ya ajabu sana!” Haya ndiyo yatakuwa maneno yaliyo moyoni mwako. Baada ya kupitia usafishaji wa Mungu kwa muda (jaribu la watoa huduma na wakati wa kuadibu), baadhi ya watu hatimaye walisema, “Kumwamini Mungu si jambo rahisi kweli!” Ukweli kwamba walitumia maneno, “si jambo rahisi kweli,” unaonyesha kwamba matendo ya Mungu ni yasiyoweza kueleweka, kwamba kazi ya Mungu ina umuhimu na thamani kubwa, na kwamba kazi Yake inastahili sana kuthaminiwa na mwanadamu. Kama, baada ya Mimi kufanya kazi nyingi sana, usingekuwa na ufahamu hata kidogo, basi, je, kazi Yangu bado ingeweza kuwa na thamani? Itakufanya useme, “Kumtumikia Mungu kwa kweli si jambo rahisi, matendo ya Mungu ni ya ajabu sana, na Mungu kweli ni mwenye hekima! Mungu anapendeza sana!” Ikiwa, baada ya kupitia kipindi cha uzoefu, unaweza kusema maneno kama hayo, basi hili linathibitisha kwamba umepata kazi ya Mungu juu yako. Siku moja, unapokuwa unahubiri ng’ambo na mtu akuulize, “Imani yako kwa Mungu inaendeleaje?” utaweza kusema, “Matendo ya Mungu ni ya ajabu sana!” Atahisi kwamba maneno yako yanazungumzia uzoefu wa vitendo. Huu ni ushuhuda wa kweli. Utasema kwamba kazi ya Mungu ni yenye hekima nyingi, kwamba kazi Yake kwako imekusadikisha kweli na kuushinda moyo wako, na kwamba utampenda Yeye daima kwa sababu Yeye anastahili kabisa upendo wa mwanadamu! Ikiwa unaweza kuzungumza kuhusu mambo haya, basi unaweza kuigusa mioyo ya watu. Yote haya ni ushuhuda. Ikiwa unaweza kutoa ushuhuda huu kwa kishindo, ukiwagusa watu hadi kutokwa na machozi, hilo linaonyesha kwamba wewe ni mtu anayempenda Mungu kweli, kwa maana unaweza kutoa ushuhuda wa kumpenda Mungu, na kupitia kwako, matendo ya Mungu yanaweza kuthibitishwa katika ushuhuda. Ikiwa ushuhuda wako unawawezesha wengine kuitafuta kazi ya Mungu, kupitia kazi ya Mungu, na kusimama imara katika mazingira yoyote wanayopitia, huu na ushuhuda wa aina hii tu ndio ushuhuda wa kweli, na hiki ndicho hasa kinachohitajika kwako sasa. Unapaswa kuona kwamba kazi ya Mungu ni ya thamani sana na inastahili kuthaminiwa na watu, kwamba Mungu ni wa thamani sana na mwenye utele sana; Siyo tu kwamba anaweza kuzungumza, bali pia anaweza kuwahukumu watu, kusafisha mioyo yao, kuwaletea burudisho, kuwapata, kuwashinda, na kuwafanya kuwa watimilifu. Kutokana na upitiaji wako utaona kwamba Mungu ni mwenye kupendeka sana. Kwa hivyo unampenda Mungu kiasi gani sasa? Je, unaweza kweli kusema mambo haya kutoka moyoni mwako? Unapoweza kuonyesha maneno haya kutoka katika kina cha moyo wako, basi utakuwa na ushuhuda. Punde tu upitiaji wako utakapofikia kiwango hiki utaweza kutoa ushuhuda kwa ajili ya Mungu, na utakuwa na sifa ya kufanya hivyo. Usipofikia kiwango hiki katika upitiaji wako, basi bado utakuwa mbali sana. Ni kawaida kwa watu kuonyesha udhaifu wakati wa mchakato wa usafishaji, lakini baada ya usafishaji unapaswa kuweza kusema, “Mungu ni mwenye hekima sana katika kazi Yake!” Ikiwa unaweza kweli kufikia ufahamu wa vitendo wa maneno haya, hilo litakuwa jambo la thamani, na upitiaji wako utakuwa na thamani.

Unapaswa kufuatilia nini sasa? Iwapo unaweza kutoa ushuhuda kwa kazi ya Mungu au la, iwapo unaweza kuwa ushuhuda na udhihirisho wa Mungu au la, na iwapo wewe ni mwenye kustahili kutumiwa na Yeye au la—haya ndiyo mambo unayopaswa kufuatilia. Mungu amefanya kazi kiasi gani kwako kweli? Umeona kiasi gani, umeelewa kiasi gani? Umepitia kiasi gani, na kuonja kiasi gani? Bila kujali kama Mungu amekujaribu, amekupogoa, au amekutia adabu, matendo Yake na kazi Yake vimetekelezwa kwako. Lakini kama muumini wa Mungu na kama mtu aliye tayari kufuatilia kufanywa mtimilifu na Yeye, je, unaweza kutoa ushuhuda kwa kazi ya Mungu kwa msingi wa upitiaji wako wa vitendo? Je, unaweza kuishi kwa kudhihirisha neno la Mungu kupitia uzoefu wako wa vitendo? Je, unaweza kuwaruzuku wengine kupitia uzoefu wako wa vitendo, na kuyatumia maisha yako yote kutoa ushuhuda kwa kazi ya Mungu? Ili kutoa ushuhuda kwa kazi ya Mungu, lazima utegemee upitiaji wako, maarifa, na gharama ambayo umelipa. Ni kwa namna hii tu ndiyo unaweza kuridhisha nia Zake. Je, wewe ni mtu anayetoa ushuhuda kwa kazi ya Mungu? Je, una azimio hili? Ikiwa unaweza kulitolea ushuhuda jina Lake, na hata zaidi, kazi Yake, na ikiwa unaweza kuishi kwa kudhihirisha mfano wa watu Wake ambao Anahitaji, basi wewe ni shahidi wa Mungu! Je, unamtoleaje Mungu ushuhuda hasa? Ikiwa unatafuta na kutamani kuishi kwa kudhihirisha neno la Mungu, na kutoa ushuhuda kwa kinywa chako mwenyewe, kiasi kwamba watu wanaweza kuja kuijua kazi Yake na kuona matendo Yake—ikiwa unafuatilia hili kweli, basi Mungu atakufanya kuwa mtimilifu. Ikiwa unachofuatilia tu ni kufanywa kuwa mtimilifu na Mungu na kubarikiwa mwishowe kabisa, basi mtazamo wa imani yako kwa Mungu si safi. Unapaswa kuwa unafuatilia jinsi ya kuona matendo ya Mungu katika maisha halisi, jinsi ya kumridhisha Yeye anapodhihirisha nia Zake kwako, na kufuatilia jinsi unavyopaswa kutolea ushuhuda ajabu na hekima Yake, na jinsi ya kutoa ushuhuda kwa jinsi Anavyokutia adabu na kukupogoa. Haya yote ni mambo unayopaswa kuwa unatafakari sasa. Ikiwa moyo wako umpendao Mungu ni kwa ajili tu ya wewe kupata utukufu pamoja na Mungu baada ya Yeye kukufanya kuwa mtimilifu, basi bado hautoshi na hauwezi kufikia matakwa ya Mungu. Unahitaji kuweza kutoa ushuhuda kwa kazi ya Mungu, kuridhisha matakwa Yake, na kupitia kazi Anayofanya kwa watu kwa njia ya vitendo. Iwe ni uchungu, machozi, au huzuni, lazima upitie mambo haya yote kwa vitendo. Yanakusudiwa kukufanya kuwa mtimilifu kama shahidi wa Mungu. Ni nini hasa, kinachokusukuma sasa kuteseka na kufuatilia kufanywa kuwa mtimilifu? Je, mateso yako ya sasa ni kwa ajili ya kumpenda Mungu na kutoa ushuhuda Kwake kwa kweli? Au ni kwa ajili ya baraka za mwili, kwa ajili ya matarajio na hatima yako ya baadaye? Nia, motisha, na malengo yako yote unayofuatilia lazima yarekebishwe na hayapaswi kuongozwa na mapenzi yako mwenyewe. Mtu mmoja akifuatilia kufanywa mtimilifu ili kupokea baraka na kutumia mamlaka kama mfalme, huku mtu mwingine akifuatilia kufanywa kuwa mtimilifu ili amridhishe Mungu, kutoa ushuhuda kwa kazi ya Mungu kwa vitendo, ni ipi kati ya njia hizi mbili za ufuatiliaji ambayo ungechagua? Kama ungechagua ya kwanza, basi bado ungekuwa mbali sana na viwango vya Mungu. Niliwahi kusema kwamba matendo Yangu yangewekwa wazi katika ulimwengu wote na kwamba Ningetumia mamlaka kama Mfalme katika ulimwengu. Kwa upande mwingine, kile ambacho mmekabidhiwa ni kutoa ushuhuda kwa kazi ya Mungu, si kuwa wafalme na kuonekana kwa ulimwengu wote. Kuyafanya matendo ya Mungu yaujaze ulimwengu na anga, kumruhusu kila mtu ayaone na kuyakubali—maneno haya yanasemwa kuhusiana na Mungu Mwenyewe, na kile ambacho wanadamu wanapaswa kufanya ni kutoa ushuhuda kwa Mungu. Unaelewa kiasi gani kumhusu Mungu? Unaweza kutoa ushuhuda kiasi gani kwa Mungu? Kusudi la Mungu kumfanya mwanadamu kuwa mtimilifu ni nini? Punde tu unapoelewa nia za Mungu, unapaswa kuzijali vipi nia Zake? Ikiwa uko tayari kufanywa kuwa mtimilifu na kutoa ushuhuda kwa kazi ya Mungu kupitia kile unachoishi kwa kudhihirisha, ikiwa una nguvu hii ya kusukuma, basi hakuna kilicho kigumu sana. Kile ambacho watu wanahitaji sasa ni imani. Ikiwa una nguvu hii ya kusukuma, basi ni rahisi kuacha uhasi wowote, kutofanya jitihada, uvivu na dhana za mwili, falsafa za kushughulika na mambo ya kidunia, tabia ya uasi, hisia, na kadhalika.

Wakati wa kupitia majaribu, ni kawaida kwa watu kuwa dhaifu, kuwa hasi ndani yao, kutoelewa nia za Mungu, au kukosa uwazi kuhusu njia ya utendaji. Lakini kwa vyovyote vile, lazima uwe na imani katika kazi ya Mungu, na, kama Ayubu, usimkane Mungu. Ingawa Ayubu alikuwa dhaifu na akailaani siku ya kuzaliwa kwake mwenyewe, hakukana kwamba vitu vyote ambavyo watu wanamiliki baada ya kuzaliwa vinatolewa na Yehova, na kwamba Yehova pia Ndiye wa kuvichukua. Haijalishi alipitishwa katika majaribu gani, alidumisha imani hii. Katika upitiaji wako, haijalishi ni usafishaji gani unaopitia kutoka katika maneno ya Mungu, kile ambacho Mungu anataka, kwa ujumla, ni imani yako na moyo umpendao Mungu. Kile Anachokikamilisha kwa kufanya kazi kwa njia hii ni imani, upendo, na azimio la mwanadamu. Mungu anafanya kazi ya ukamilisho kwa mwanadamu, ambayo mwanadamu hawezi kuiona wala kuigusa; chini ya mazingira kama haya, imani inahitajika. Wakati kitu hakiwezi kuonekana kwa macho, imani inahitajika. Wakati huwezi kuachilia dhana zako mwenyewe, imani inahitajika. Wakati huna uwazi kuhusu kazi ya Mungu, kile kinachohitajika ni wewe kuwa na imani na kuchukua msimamo thabiti na kusimama imara katika ushuhuda wako. Ayubu alipofikia hatua hii, Mungu alimtokea na kuzungumza naye. Yaani, ni wakati tu unapokuwa na imani ndipo utaweza kumwona Mungu. Unapokuwa na imani, Mungu atakufanya kuwa mtimilifu, na ikiwa huna imani, Hawezi kufanya hili. Mungu atakupa chochote unachotarajia kupata. Ikiwa huna imani, basi huwezi kufanywa kuwa mtimilifu na hutaweza kuona matendo ya Mungu, sembuse uweza Wake. Wakati, katika uzoefu wako halisi, una imani ya kuona matendo Yake, Mungu atakutokea, na Atakutia nuru na kukuongoza kutoka ndani. Bila imani hiyo, Mungu hataweza kufanya hilo. Ikiwa umepoteza matumaini kwa Mungu, utawezaje kupitia kazi Yake? Kwa hivyo, ni wakati tu unapokuwa na imani na huna mashaka kwa Mungu, ni wakati tu unapokuwa na imani ya kweli Kwake bila kujali Anafanya nini, ndipo Atakutia nuru na kukuangaza kupitia upitiaji wako, na ni hapo tu ndipo utaweza kuona matendo Yake. Mambo haya yote yanafanikishwa kupitia imani. Imani huja tu kupitia usafishaji, na bila usafishaji, imani haiwezi kukua. Imani inarejelea nini? Imani ni kuamini kwa kweli na moyo wa dhati ambao binadamu wanapaswa kuwa nao wakati hawawezi kuona wala kugusa kitu, wakati kazi ya Mungu haiendani na dhana za binadamu na iko mbali na uwezo wa binadamu. Hii ndiyo imani Ninayozungumzia. Watu wanahitaji kuwa na imani wakati wa mateso na wakati wa usafishaji, na wanapokuwa na imani, basi wanakabiliwa na usafishaji—usafishaji na imani haviwezi kutenganishwa. Ikiwa, bila kujali Mungu anafanya kazi namna gani, na haijalishi mazingira yako, unaweza kufuatilia uzima na kuutafuta ukweli, kufuatilia maarifa ya kazi ya Mungu, na kutafuta kujua matendo Yake, na unaweza kutenda kulingana na ukweli, huku ni kuwa na imani ya kweli, na kunathibitisha kwamba hujapoteza imani katika Mungu. Ikiwa, wakati wa usafishaji, unaweza kuendelea kufuatilia ukweli, kumpenda Mungu kweli, na hukuzi mashaka kumhusu, na ikiwa, bila kujali Anafanya nini, bado unatenda ukweli ili kumridhisha, na unaweza kutafuta nia Zake katika kina cha moyo wako na kujali nia Zake, hii ndiyo maana ya kuwa na imani ya kweli kwa Mungu. Zamani, Mungu aliposema kwamba ungetumia mamlaka kama mfalme, ulimpenda, na Alipojionyesha wazi kwako, ulimfuatilia Yeye. Lakini sasa Mungu amefichika, huwezi kumwona, na ugumu umekujia—wakati huu, je, unapoteza matumaini kwa Mungu? Kwa hivyo, lazima wakati wote ufuatilie uzima na utafute kuridhisha nia za Mungu. Hii inaitwa imani ya kweli, na hii ndiyo aina ya upendo ulio wa kweli na mzuri zaidi ya yote.

Zamani, watu wote walikuwa wakija mbele za Mungu kufanya maazimio yao, na walikuwa wakisema, “Hata kama hakuna mtu mwingine anayempenda Mungu, lazima nimpende.” Lakini sasa, usafishaji unakujia, na kwa kuwa hili haliendani na dhana zako, unapoteza imani katika Mungu. Je, huu ni upendo wa kweli? Umesoma mara nyingi kuhusu matendo ya Ayubu—je, umeyasahau? Upendo wa kweli unaweza tu kuchukua umbo kutoka ndani ya imani. Kukuza upendo wa kweli kwa Mungu kupitia usafishaji unaopitia, na, katika uzoefu wako halisi, kujali nia za Mungu kwa imani, na kuuasi mwili wako mwenyewe na kufuatilia uzima kwa imani—hiki ndicho watu wanapaswa kufanya. Ukifanya hivi, basi utaweza kuona matendo ya Mungu, lakini ikiwa huna imani, basi hutaweza kuona matendo ya Mungu au kupitia kazi Yake. Ikiwa unataka kutumiwa na kufanywa kuwa mtimilifu na Mungu, basi lazima uwe na kila kipengele cha ukweli: azimio la kuteseka, imani, uvumilivu, utii, na uwezo wa kutafuta ukweli na kuelewa nia za Mungu, uwezo wa kujali huzuni Yake na nia za kujitahidi, na kadhalika. Kumfanya mtu kuwa mtimilifu si rahisi, na kila usafishaji unaopitia unahitaji imani na upendo wako. Ikiwa unataka kufanywa kuwa mtimilifu na Mungu, haitoshi tu kukimbia huku na huko, wala haitoshi tu kujitumia kwa ajili ya Mungu. Lazima uwe na mambo mengi ili uweze kuwa mtu anayefanywa kuwa mtimilifu na Mungu. Unapokabiliwa na mateso, lazima uweze kuweka kando kujali kwako kuhusu mwili na usitoe malalamiko dhidi ya Mungu. Mungu anapojificha, lazima uweze kuwa na imani ya kumfuata, kudumisha upendo wako wa awali bila kuuruhusu ubadilike au kutoweka. Bila kujali Mungu anafanya nini, lazima umwache Mungu akupangie jinsi Apendavyo, na uwe tayari kuulaani mwili wako mwenyewe badala ya kutoa malalamiko dhidi Yake. Unapokabiliwa na majaribu, lazima uwe tayari kuvumilia maumivu ya kuacha kile unachopenda na kulia kwa uchungu, badala ya kushindwa kumridhisha Mungu. Huu pekee ndio upendo wa kweli na imani ya kweli. Haijalishi kimo chako halisi ni kipi, lazima kwanza uwe na azimio hili la kuteseka na imani ya kweli. Lazima pia uwe na azimio la kuuasi mwili; lazima uwe tayari kuteseka na kupata hasara katika masilahi yako binafsi, badala ya kushindwa kuridhisha nia za Mungu. Lazima pia uwe na uwezo wa kuhisi majuto moyoni mwako: Zamani, hukuweza kumridhisha Mungu, na sasa, unaweza kujuta. Ni sharti usipungukiwe katika lolote kati ya mambo haya—ni kupitia mambo haya ndiyo Mungu atakufanya kuwa mtimilifu. Kama hutimizi masharti haya, basi huwezi kufanywa kuwa mtimilifu.

Mtu anayemtumikia Mungu hapaswi kujua kuteseka kwa ajili Yake tu; zaidi ya hayo, anapaswa kuelewa kwamba kusudi la kumwamini Mungu ni kufuatilia kumpenda Mungu. Mungu hakutumii tu ili akusafishe na akufanye uteseke, bali Anakutumia ili uweze kujua matendo Yake, kujua maana ya kweli ya maisha ya binadamu, na hata zaidi, kujua kwamba kumtumikia Mungu si kazi rahisi. Kupitia kazi ya Mungu si kuhusu kufurahia neema; badala yake zaidi ni kuhusu kuteseka kwa ajili ya kumpenda Mungu. Kwa kuwa unafurahia neema ya Mungu, lazima pia ufurahie kuadibu Kwake; lazima upitie haya yote. Ikiwa unaweza kupitia Mungu kukutia nuru, na unaweza pia kupitia Yeye kukupogoa na kukuhukumu, upitiaji wako utakuwa kamili. Mungu ametekeleza kazi Yake ya hukumu kwako, na pia ametekeleza kazi Yake ya kuadibu kwako. Neno la Mungu limekupogoa, lakini pia limekutia nuru na kukuangaza. Unapokuwa hasi na dhaifu, Mungu bado anajali kukuhusu. Kazi hii yote inakufundisha kwamba kila kitu kuhusu mwanadamu kiko ndani ya mipango ya Mungu. Unaweza kufikiri kwamba kumwamini Mungu ni kuhusu kuteseka tu, au kufanya mambo mengi kwa ajili Yake, au mwili wako kuwa na amani, au kila kitu kukuendea vizuri, na wewe kuwa na raha na utulivu katika mambo yote. Hakuna hata moja kati ya haya ambalo ni kusudi ambalo watu wanapaswa kuwa nalo katika imani yao katika Mungu. Ikiwa unaamini kwa sababu ya makusudi haya, basi mtazamo wako si sahihi, na haiwezekani kabisa kwako kufanywa kuwa mtimilifu. Matendo ya Mungu, tabia ya haki ya Mungu, hekima Yake, maneno Yake, na ajabu Yake na kutoeleweka Kwake yote ni mambo ambayo watu wanapaswa kuelewa. Kupitia ufahamu huu, unapaswa kuuondolea moyo wako matakwa, matumaini, na dhana zako za kibinafsi. Ni kwa kuondoa mambo haya tu ndiyo unaweza kutimiza masharti yanayohitajika na Mungu. Ni kupitia hili tu ndiyo unaweza kuwa na uzima na kumridhisha Mungu. Kusudi la kumwamini Mungu ni kumridhisha Yeye na kuishi kwa kudhihirisha tabia Anayotaka, ili matendo Yake na utukufu Wake viweze kudhihirishwa kupitia kundi hili la watu wasiostahili. Huu ndio mtazamo sahihi kuhusu kumwamini Mungu, na hili pia ndilo lengo ambalo unapaswa kufuatilia. Mtazamo wako kuhusu kumwamini Mungu lazima urekebishwe, na unapaswa kutafuta kupata maneno ya Mungu. Unahitaji kula na kunywa maneno ya Mungu na lazima uweze kuishi kwa kudhihirisha ukweli, na hasa lazima uweze kuona matendo Yake halisi, matendo Yake ya ajabu katika ulimwengu mzima, pamoja na kazi ya kivitendo Anayofanya katika mwili. Kupitia uzoefu wako halisi, utakuja kuelewa jinsi hasa Mungu anavyofanya kazi juu yako na nia za Mungu kwako ni nini. Kusudi la haya yote ni ili uweze kuvua tabia zako potovu za kishetani. Hivyo utavua unajisi na udhalimu wote ndani yako, na utavua nia zako zisizo sahihi, na utakuza imani ya kweli katika Mungu. Ni kwa imani ya kweli tu ndiyo unaweza kumpenda Mungu kweli. Unaweza tu kumpenda Mungu kwa dhati kwa msingi wa kumwamini Yeye. Je, unaweza kufikia upendo kwa Mungu bila kumwamini Yeye? Kwa kuwa unamwamini Mungu, huwezi kuwa umekanganyika kuhusu hilo. Watu wengine wanapata motisha punde tu wanapoona kwamba imani katika Mungu itawaletea baraka, lakini kisha wanapoteza motisha yote punde tu wanapoona kwamba wanapaswa kupitia usafishaji. Je, huko ni kumwamini Mungu? Hatimaye, lazima ufikie utii kamili na wa dhati mbele za Mungu katika imani yako. Unamwamini Mungu, lakini ikiwa bado unatoa matakwa Kwake, una dhana nyingi za kidini ambazo huwezi kuziweka chini, masilahi ya kibinafsi ambayo huwezi kuyaacha, na bado unafuatilia baraka za mwili na unataka Mungu auokoe mwili wako, aiokoe nafsi yako, basi unaonyesha tabia ya mtu aliye na mtazamo usio sahihi. Ingawa watu walio na imani za kidini wana imani katika Mungu, hawatafuti kubadilisha tabia zao na hawafuatilii maarifa ya Mungu, bali badala yake wanafuatilia tu masilahi ya miili yao. Wengi miongoni mwenu wana imani ambazo ziko katika kundi la imani za kidini; hii si imani ya kweli katika Mungu. Ili kumwamini Mungu, watu lazima wawe na moyo ambao umejitayarisha kuteseka kwa ajili Yake na azimio la kujikana. Watu wasipotimiza masharti haya mawili, imani yao katika Mungu si halali, na hawataweza kufikia mabadiliko katika tabia zao. Ni watu tu wanaofuatilia ukweli, maarifa ya Mungu, na uzima kwa dhati ndio wale wanaomwamini Mungu kweli.

Majaribu yanapokujia, utayachukuliaje majaribu hayo kwa kuzingatia kazi ya Mungu? Je, utakuwa hasi, au utajaribu kuelewa jaribu la Mungu na usafishaji Wake wa mwanadamu kutoka katika mtazamo chanya? Utapata nini kupitia majaribu na usafishaji wa Mungu? Je, upendo wako kwa Mungu utakua? Unapopitia usafishaji, je, utaweza kuchukulia kwa dhati, kwa kuzingatia majaribu ya Ayubu, kazi ambayo Mungu anafanya juu yako? Kupitia majaribu ya Ayubu, je, unaweza kuona jinsi Mungu anavyomjaribu mwanadamu? Majaribu ya Ayubu yanaweza kukuletea utambuzi wa aina gani? Je, utakuwa tayari kusimama imara katika ushuhuda wako kwa Mungu katikati ya usafishaji wako, au utataka kuuridhisha mwili katika mazingira ya kustarehesha? Mtazamo wako kuhusu imani katika Mungu ni upi kweli? Je, ni kwa ajili Yake kweli, na si kwa ajili ya mwili? Je, kwa kweli una lengo katika ufuatiliaji wako? Je, uko tayari kupitia usafishaji ili uweze kufanywa kuwa mtimilifu na Mungu, au ungependelea kuadibiwa na kulaaniwa na Mungu? Mtazamo wako kuhusu suala la kumshuhudia Mungu ni upi kweli? Watu wanapaswa kufanya nini katika mazingira fulani ili kutoa ushuhuda wa kweli kwa ajili ya Mungu? Kwa kuwa Mungu wa vitendo amefunua kazi Yake nyingi ya kivitendo kupitia kwako, kwa nini daima una fikira za kuondoka? Je, imani yako katika Mungu ni kwa ajili ya Mungu? Wengi wenu mnajifikiria wenyewe na mnafuatilia manufaa yenu ya kibinafsi. Watu wachache sana wanamwamini Mungu kwa ajili ya Mungu; je, si huu ni uasi?

Kusudi la kazi ya usafishaji kimsingi ni kufanya imani ya watu kuwa timilifu. Hatimaye, kile kinachofikiwa ni kwamba unataka kuondoka lakini huwezi, kwamba watu wengine bado wanaweza kuwa na imani hata wanapokuwa bila hata chembe ndogo kabisa ya matumaini, na kwamba watu hawana tena matumaini yoyote kabisa kuhusu matarajio yao wenyewe. Ni wakati huu tu ndipo usafishaji wa Mungu utakapomalizika. Ikiwa watu bado hawajafikia hatua ya kuwa kati ya uzima na mauti, na hawajaonja kifo, basi usafishaji wao hautakuwa umemalizika. Hata wale waliokuwa katika hatua ya watendaji huduma hawakusafishwa kwa kiwango kamili. Ayubu alipitia usafishaji kwa kiwango chake kamili, na hakuwa na chochote cha kutegemea. Watu lazima wasafishwe hadi kufikia hatua hiyo hiyo—ambapo hawana chembe ya matumaini na hawana hata kitu kimoja cha kutegemea. Huu pekee ndio usafishaji wa kweli. Katika wakati wa watendaji huduma, iwapo moyo wako ungekuwa mtulivu daima mbele za Mungu, na kama bila kujali Alifanya nini na bila kujali nia Zake kwako zilikuwa zipi, ungetii mipango Yake daima, basi mwishoni mwa njia ungeelewa kila kitu ambacho Mungu alikuwa amefanya. Unapopitia majaribu ya Ayubu, wewe pia, wakati huo huo, unapitia majaribu ya Petro. Ayubu alipojaribiwa, alisimama imara katika ushuhuda wake, na mwishowe, Yehova alimtokea. Ni baada tu ya kusimama imara katika ushuhuda wake ndipo alistahili kuuona uso wa Mungu. Kwa nini inasemwa, “Mimi ninajificha kutoka katika nchi ya uchafu lakini ninaonekana kwa ufalme mtakatifu”? Hii inamaanisha kwamba ni wakati tu unapotakaswa na kusimama imara katika ushuhuda wako ndipo unastahili kuuona uso wa Mungu. Ikiwa huwezi kusimama imara katika ushuhuda wako, hustahili kuuona uso Wake. Ukirudi nyuma au ukitoa malalamiko dhidi ya Mungu unapokabiliwa na usafishaji, na hivyo ukishindwa kusimama imara katika ushuhuda wako na kuwa kichekesho cha Shetani, basi hutapata kuonekana kwa Mungu. Ikiwa wewe ni kama Ayubu, ambaye katikati ya majaribu aliulaani mwili wake mwenyewe, lakini hakulalamika dhidi ya Mungu, na aliweza kuuchukia mwili wake mwenyewe bila kulalamika au kutenda dhambi kupitia maneno yake, basi utakuwa ukisimama imara katika ushuhuda wako. Unapopitia usafishaji kwa kiwango fulani na unaweza kuwa kama Ayubu, mtiifu kabisa mbele za Mungu na bila matakwa mengine Kwake au dhana zako mwenyewe, basi Mungu atakuonekania. Sasa Mungu hakuonekanii kwa sababu una dhana zako nyingi sana, maoni ya awali ya upendeleo wa kibinafsi, mawazo ya ubinafsi, matakwa ya kibinafsi na masilahi ya kimwili, na hustahili kuuona uso Wake. Kama ungemwona Mungu, ungempima kupitia dhana zako mwenyewe na, kwa kufanya hivyo, Angesulubiwa msalabani na wewe. Ikiwa mambo mengi yanakujia ambayo hayaendani na dhana zako lakini bado unaweza kuziachilia na kupata maarifa ya matendo ya Mungu kutokana na mambo haya, na katikati ya usafishaji unaufunua moyo wako umpendao Mungu, basi huku ni kusimama imara katika ushuhuda wako. Ikiwa nyumba yako ina amani, unafurahia starehe za mwili, hakuna anayekutesa, na ndugu zako kanisani wanakutii, je, moyo wako umpendao Mungu unaweza kudhihirishwa? Je, hali hii inaweza kukusafisha? Ni kupitia usafishaji tu ndiyo moyo wako umpendao Mungu unaweza kuonyeshwa, na ni kupitia tu mambo yanayotokea ambayo hayaendani na dhana zako ndiyo unaweza kufanywa kuwa mtimilifu. Kwa huduma ya mambo mengi hasi, na kwa kutumia kila aina ya udhihirisho wa Shetani—matendo yake, mashtaka yake, usumbufu wake na upotoshaji wake—Mungu anakuonyesha uso mbaya wa Shetani waziwazi, na hivyo kukupa uwezo wa kumtambua Shetani, ili uweze kumchukia Shetani na kumwasi.

Upitiaji wako mwingi wa kushindwa, wa udhaifu, vipindi vyako vingi vya uhasi, vyote vinaweza kusemwa kuwa majaribu ya Mungu. Hii ni kwa sababu kila kitu kinatoka kwa Mungu, na vitu vyote na matukio yote yako mikononi Mwake. Iwe unashindwa au iwe wewe ni dhaifu na unajikwaa, yote yanamtegemea Mungu na yamo chini ya mamlaka Yake. Kutoka katika mtazamo wa Mungu, hili ni jaribu kwako, na ikiwa huwezi kutambua hilo, litakuwa kishawishi. Kuna hali za aina mbili ambazo mwanadamu anapaswa kutambua: Moja inatoka kwa Roho Mtakatifu, na chanzo cha ile nyingine huenda ni Shetani. Moja ni hali ambayo Roho Mtakatifu anakuangaza na kukuruhusu ujijue, ujichukie na uhisi majuto kwako mwenyewe, uweze kuwa na upendo wa kweli kwa Mungu, na ufanye azimio la kumridhisha. Ile nyingine ni hali ambamo unajijua, lakini wewe ni hasi na dhaifu. Inaweza kusemwa kwamba huu ni usafishaji wa Mungu, na pia kwamba ni kishawishi cha Shetani. Ikiwa unatambua kwamba huu ni wokovu wa Mungu kwako na ikiwa unahisi kwamba sasa wewe ni mdeni Wake sana—na kwamba kuanzia sasa unapaswa kujaribu kufidia, kuacha kukaa katika upotovu kama huo, na kula na kunywa maneno ya Mungu ipasavyo—na ikiwa daima unajiona kuwa hufai, na una moyo wa kutamani, basi hili ni jaribu la Mungu. Baada ya mateso kuisha na unaposonga mbele kwa mara nyingine, Mungu bado atakuongoza, kukuangaza, kukutia nuru, na kukulisha. Lakini ikiwa huwezi kulitambua na unakuwa hasi, ukijitelekeza tu katika kukata tamaa, ikiwa unafikiri kwa namna hii, basi inamaanisha kishawishi cha Shetani kimekujia. Ayubu alipopitia majaribu, Mungu na Shetani walikuwa wakiwekeana dau, na Mungu alimruhusu Shetani amtese Ayubu. Ingawa ni Mungu aliyekuwa akimjaribu Ayubu, kwa kweli alikuwa Shetani aliyemjia. Kwa Shetani, ilikuwa kumshawishi Ayubu, lakini Ayubu alisimama upande wa Mungu. Isingekuwa hivyo, basi Ayubu angeanguka katika kishawishi. Punde tu watu wanapoanguka katika kishawishi, wanaanguka katika hatari. Kupitia usafishaji kunaweza kusemwa kuwa jaribu kutoka kwa Mungu, lakini ikiwa hauko katika hali nzuri, inaweza kusemwa kuwa kishawishi kutoka kwa Shetani. Ikiwa huna uwazi kuhusu maono, Shetani atakushtaki na kuutia ukungu mtazamo wako wa maono. Kabla hujajua, utaanguka katika kishawishi.

Ikiwa hupitii kazi ya Mungu, basi hutaweza kamwe kufanywa kuwa mtimilifu. Katika upitiaji wako, lazima pia uingie katika mambo ya kina. Kwa mfano, ni mambo gani yanayokufanya ukuze dhana na nia nyingi, na una utendaji wa aina gani unaofaa wa kushughulikia matatizo haya? Ikiwa unaweza kupitia kazi ya Mungu, hili linamaanisha kwamba una kimo. Ikiwa una nguvu kwa nje tu, hiki si kimo cha kweli na hakika hutaweza kusimama imara. Ni wakati tu unapoweza kupitia kazi ya Mungu na unaweza kuipitia na kuitafakari wakati wowote na mahali popote, wakati mnaweza kuwaacha wachungaji na kuishi kwa kujitegemea kwa kumtegemea Mungu, na mnaweza kuona matendo halisi ya Mungu—ni hapo tu ndipo nia za Mungu zitafikiwa. Sasa hivi, watu wengi hawajui jinsi ya kupitia, na wanapokumbana na suala, hawajui jinsi ya kulishughulikia; hawawezi kupitia kazi ya Mungu, na hawawezi kuishi maisha ya kiroho. Ni lazima uyalete maneno na kazi ya Mungu katika maisha yako halisi.

Wakati mwingine Mungu anakupa hisia ya aina fulani, hisia inayokufanya upoteze kufurahia kwako kwa ndani na upoteze uwepo wa Mungu, kiasi kwamba unatumbukizwa gizani. Hii ni aina ya usafishaji. Kila unapofanya chochote, kila mara kinaenda mrama, au unagonga mwamba. Huku ni kutiwa adabu na Mungu. Wakati mwingine, unapofanya jambo ambalo ni la uasi na la kumpinga Mungu, hakuna mtu mwingine anayeweza kujua kuhusu hilo—lakini Mungu anajua. Hatakuachilia, na Atakutia adabu. Kazi ya Roho Mtakatifu ni ya kina sana. Yeye huchunguza kwa uwazi mkubwa kila neno na tendo la watu, kila kitendo na hatua yao, na kila wazo na fikira yao, akiwapa ufahamu kwa ndani. Unafanya jambo mara moja na linaenda mrama, unafanya jambo tena na bado linaenda mrama, na polepole utakuja kuielewa kazi ya Roho Mtakatifu. Kupitia kutiwa adabu mara nyingi, utajua la kufanya ili kulingana na nia za Mungu na lile ambalo halilingani na nia Zake. Hatimaye, utakuwa na miitikio sahihi kwa mwongozo wa Roho Mtakatifu kutoka ndani yako. Wakati mwingine utakuwa mwasi na utakemewa na Mungu kutoka ndani. Haya yote yanatokana na kutiwa adabu na Mungu. Ikiwa hulithamini neno la Mungu, ikiwa unaipuuza kazi Yake, basi Hatakujali. Kadiri unavyoyachukulia maneno ya Mungu kwa uzito zaidi, ndivyo Atakavyokutia nuru zaidi. Sasa hivi, kuna watu wengine kanisani ambao wamekanganyika na kuchanganyikiwa katika imani yao katika Mungu, na wanafanya mambo mengi yanayovuka mipaka bila kutiwa adabu, na hivyo kazi ya Roho Mtakatifu haiwezi kuonekana wazi ndani yao. Ili kupata pesa, watu wengine wanatelekeza agizo lao na kwenda nje kufanya biashara, na hawatiwi adabu kwa sababu ya hili; mtu wa aina hiyo yuko katika hatari zaidi. Siyo tu kwamba kwa sasa hana kazi ya Roho Mtakatifu, bali katika siku za usoni, atakuwa mgumu kufanywa kuwa mtimilifu. Kuna watu wengi ambao kazi ya Roho Mtakatifu haiwezi kuonekana ndani yao na ambao adabu ya Mungu haiwezi kuonekana ndani yao. Wao ni wale ambao hawana ufahamu kuhusu nia za Mungu na ambao hawajui kazi Yake. Ikiwa, katikati ya usafishaji, watu wanaweza kusimama imara, kumfuata Mungu bila kujali Anafanya nini, angalau kutoondoka, na kufikia 0.1% ya kile ambacho Petro alifikia, basi hilo linatosha. Hata hivyo, watu kama hao hawana thamani katika suala la Mungu kuwatumia. Watu wengi wanaelewa mambo haraka, wana upendo wa kweli kwa Mungu, na wanaweza kuzidi kiwango cha Petro, na Mungu anafanya juu yao kazi ya kuwafanya kuwa watimilifu. Adabu na nuru huwajia watu kama hao, na ikiwa kuna kitu ndani yao ambacho hakilingani na nia za Mungu, wanaweza kukitupa mbali mara moja. Watu kama hao ni dhahabu, fedha, na mawe ya thamani—thamani yao ni ya juu sana! Ikiwa Mungu amefanya kazi nyingi lakini bado wewe ni kama mchanga au jiwe, basi huna thamani!

Kazi ya Mungu katika nchi ya joka kuu jekundu ni ya ajabu na isiyoweza kupimika. Atalifanya kundi moja la watu kuwa timilifu na kuondosha wengine, kwa maana kuna watu wa kila aina kanisani—kuna wale wanaoupenda ukweli, na wale wasioupenda; kuna wale wanaoipitia kazi ya Mungu, na wale wasioipitia; kuna wale wanaotekeleza wajibu wao, na wale wasioutekeleza; kuna wale wanaomshuhudia Mungu, na wale wasiomshuhudia—na sehemu yao ni wasioamini na watu waovu, na hakika wataondoshwa. Ikiwa huijui kazi ya Mungu wazi wazi, basi utakuwa hasi; hii ni kwa sababu kazi ya Mungu inaweza tu kuonekana katika watu wachache. Wakati huu, itafunuliwa ni nani anayempenda Mungu kweli na ni nani hampendi. Wale wanaompenda Mungu kweli wana kazi ya Roho Mtakatifu, huku wale wasiompenda kweli watafichuliwa kupitia kila hatua ya kazi Yake. Watakuwa wale wanaoondoshwa. Watu hawa watafichuliwa katika kipindi cha kazi ya ushindi, na wao ni watu ambao hawana thamani ya kufanywa kuwa watimilifu. Wale ambao wamefanywa kuwa watimilifu wamepatwa na Mungu kikamilifu, na wana uwezo wa kumpenda Mungu kama Petro alivyofanya. Wale ambao wameshindwa hawana upendo wa hiari, bali upendo wa kulazimishwa tu, na wanalazimishwa kumpenda Mungu. Upendo wa hiari unakuzwa kupitia ufahamu uliopatikana kupitia uzoefu wa vitendo. Upendo huu huumiliki moyo wa mtu, jambo ambalo linamwezesha kuwa mwaminifu kwa Mungu kwa hiari, kuyachukua maneno ya Mungu kama msingi wake, na kuteseka kwa ajili ya Mungu. Bila shaka, haya ni mambo yanayomilikiwa na mtu ambaye amefanywa kuwa mtimilifu na Mungu. Ikiwa unatafuta tu kushindwa, basi huwezi kumshuhudia Mungu; Mungu akifikia tu lengo Lake la wokovu kupitia kuwashinda watu, basi hatua ya watendaji huduma ingalimaliza kazi hiyo. Hata hivyo, kuwashinda watu si lengo la mwisho la Mungu, ambalo ni kuwafanya watu kuwa watimilifu. Kwa hivyo badala ya kusema kwamba hatua hii ni kazi ya ushindi, sema kwamba ni kazi ya kufanya kuwa timilifu na uondoshaji. Watu wengine hawajashindwa kikamilifu, na katika mchakato wa kuwashinda, kundi la watu litafanywa kuwa timilifu. Vipengele hivi viwili vya kazi vinatekelezwa kwa pamoja. Watu hawajaondoka hata katika kipindi kirefu kama hicho cha kazi, na hili linaonyesha kwamba lengo la kushinda limefikiwa—huu ni ukweli wa kushindwa. Usafishaji si kwa ajili ya kushindwa, bali kwa ajili ya kufanywa kuwa timilifu. Bila usafishaji, watu hawangeweza kufanywa kuwa watimilifu. Kwa hivyo usafishaji una thamani kweli! Leo kundi moja la watu linafanywa kuwa timilifu na kupatwa. Baraka kumi zilizotajwa hapo awali zote zinalenga wale ambao wamefanywa kuwa watimilifu. Suala la kubadilisha umbo duniani linawalenga wale ambao wamefanywa kuwa watimilifu. Wale ambao hawajafanywa kuwa watimilifu hawastahili kurithi ahadi za Mungu.

Iliyotangulia: Wale Wanaoweza Kuutii Kabisa Uhalisi wa Mungu Ndio Wale Wanaompenda Mungu Kweli

Inayofuata: Ni kwa Kupitia Majaribu ya Kuumiza Tu Ndiyo Unaweza Kujua Kupendeza kwa Mungu

Ulimwengu umezongwa na maangamizi katika siku za mwisho. Je, hili linatupa onyo lipi? Na tunawezaje kulindwa na Mungu katikati ya majanga?

Mipangilio

  • Matini
  • Mada

Rangi imara

Mada

Fonti

Ukubwa wa Fonti

Nafasi ya Mstari

Nafasi ya Mstari

Upana wa ukurasa

Yaliyomo

Tafuta

  • Tafuta Katika Maneno Haya
  • Tafuta Katika Kitabu Hiki

Wasiliana nasi kupitia WhatsApp