Sura ya 108

Ndani Yangu, wote wanaweza kupata pumziko, na wote wanaweza kupata uhuru. Wale walio nje Yangu hawawezi kupata uhuru wala furaha, kwa sababu Roho Wangu hayuko pamoja nao. Watu kama hao wanaitwa wafu wasio na roho, ilhali Mimi huwaita wale walio ndani Yangu “watu walio hai walio na roho.” Wamechaguliwa na Mimi, na hakika watarudi kwenye kiti Changu cha enzi. Wale wanaohudumia na wale walio wa ibilisi ni wafu wasio na roho, na wote lazima waangamizwe na wafanywe kuwa si kitu. Hili ni fumbo la mpango Wangu wa usimamizi, na ni sehemu ya mpango Wangu wa usimamizi ambayo binadamu hawawezi kuielewa; hata hivyo, wakati huo huo, Nimeliweka hili hadharani kwa kila mtu. Wale ambao hawajachaguliwa na Mimi wako dhidi Yangu; wale ambao wamechaguliwa na Mimi ndio wanaopatana na Mimi. Hili halipingiki kabisa, na ndilo kanuni nyuma ya hukumu Yangu kwa Shetani. Kanuni hii inapaswa kujulikana kwa wote ili waweze kuona haki na unyofu Wangu. Yote yanayotoka kwa Shetani yatahukumiwa, yatachomwa, na yatageuzwa kuwa majivu. Hii, pia, ni ghadhabu Yangu, na kutokana na hili tabia Yangu inafanywa kuwa dhahiri hata zaidi. Kuanzia wakati huu na kuendelea, tabia Yangu itatangazwa waziwazi; itadhihirishwa hatua kwa hatua kwa mataifa na watu wasiohesabika, kwa dini zote, kwa madhehebu yote, na kwa watu wa matabaka yote. Hakuna kitakachokuwa kimefichika; yote yatafichuliwa. Kwa sababu tabia Yangu na kanuni nyuma ya matendo Yangu ni mafumbo yaliyofichika zaidi kwa wanadamu, lazima Nifanye hivi (ili wazaliwa wa kwanza wasikiuke amri Zangu za utawala, na pia ili Nitumie tabia Yangu iliyofichuliwa kuhukumu mataifa na watu wasiohesabika). Huu ni mpango Wangu wa usimamizi, na hizi ni hatua za kazi Yangu. Hakuna mtu atakayebadilisha hilo kwa urahisi. Tayari Nimeishi kwa kudhihirisha tabia kamili ya uungu Wangu ndani ya ubinadamu Wangu, kwa hivyo Simruhusu mtu yeyote kuukosea ubinadamu Wangu. (Kila kitu Ninachoishi kwa kudhihirisha ni tabia ya uungu; hii ndiyo sababu Nimesema hapo awali kwamba Mimi ni Mungu Mwenyewe ambaye Amepita ubinadamu wa kawaida.) Hakika Sitamwacha bila kumwadhibu yeyote anayetenda kosa dhidi Yangu, na Nitamwacha aangamie milele! Kumbuka! Hiki ndicho ambacho Nimeamua; yaani, hii ni sehemu ya lazima ya amri Zangu za utawala. Kila mtu anapaswa kuona hili: Mtu Niliye ni Mungu, na zaidi ya hayo, ni Mungu Mwenyewe. Hili linapaswa kuwa wazi kufikia sasa! Mimi sisemi chochote kiholela. Ninatamka na kuonyesha kila kitu waziwazi, mpaka uwe umepata ufahamu kamili.

Hali ni tete sana; si katika nyumba Yangu tu, bali hata zaidi, nje ya nyumba Yangu, Ninahitaji kwamba lazima mlitolee jina Langu ushahidi, muishi kwa kunidhihirisha Mimi, na kunitolea Mimi ushahidi katika vipengele vyote. Kwa sababu hizi ni siku za mwisho, kila kitu sasa kiko tayari na kila kitu kinahifadhi mwonekano wake wa asili, na hakuna hata jambo moja kati ya haya litakalowahi kubadilika. Wale ambao ni lazima watelekezwe watatelekezwa, na wale ambao ni lazima wahifadhiwe watahifadhiwa. Msijaribu kushikilia kwa nguvu au kusukuma mbali; msijaribu kuvuruga usimamizi Wangu au kuharibu mpango Wangu. Kutoka katika mtazamo wa binadamu, Mimi daima ni mwenye upendo na mwenye rehema kwa binadamu, lakini kwa mtazamo Wangu, tabia Yangu inatofautishwa kulingana na hatua za kazi Yangu, kwa sababu Mimi ndimi Mungu wa vitendo Mwenyewe na Mimi ndimi Mungu wa kipekee Mwenyewe! Mimi ni nisiyebadilika na ninayebadilika daima. Hili ni jambo ambalo hakuna mtu anayeweza kulielewa. Ni pale tu Ninapowaambia kulihusu na kulieleza kwenu ndipo mtakapokuwa na ufahamu wa wazi kulihusu na mtakapoweza kuelewa. Kwa wana Wangu, Mimi ni mwenye upendo, mwenye rehema, mwenye haki, na mwenye kutia adabu, lakini si mwenye kuhukumu (na kwa hilo, Ninamaanisha kwamba Siwaangamizi wazaliwa wa kwanza). Kwa watu wengine kando na wana Wangu, Ninabadilika wakati wowote kutegemea na mabadiliko ya enzi: Ninaweza kuwa mwenye upendo, mwenye rehema, mwenye haki, mwadhimu, mwenye kuhukumu, mwenye ghadhabu, mwenye kulaani, mwenye kuchoma, na, hatimaye, mwenye kuharibu miili yao. Wale wanaoangamia wataangamizwa pamoja na roho na nafsi zao. Hata hivyo, kwa wale wanaohudumu, roho na nafsi zao pekee ndizo zitakazobakizwa (na kuhusu maelezo mahususi kuhusu jinsi Ninavyolitia hili katika vitendo, Nitawaambia baadaye, ili mweze kuelewa). Hata hivyo, kamwe hawatakuwa na uhuru na kamwe hawataachiliwa, kwa sababu wako chini ya watu Wangu, na wako chini ya udhibiti wa watu Wangu. Sababu iliyonifanya Niwachukie sana watoa huduma ni kwamba wote ni uzao wa joka kubwa jekundu, na wale ambao si watoa huduma ni uzao wa joka kubwa jekundu, pia. Yaani, watu wote ambao si wazaliwa wa kwanza ni uzao wa joka kubwa jekundu. Ninaposema kwamba wale walio katika upotevu wananipa Mimi sifa za milele, Ninamaanisha kwamba watanihudumia Mimi milele. Hili halibadiliki kamwe. Watu hao daima watakuwa watumwa, ng’ombe, na farasi. Ninaweza kuwachinja wakati wowote, na Ninaweza kuwatawala Nipendavyo, kwa sababu wao ni dhuria ya joka kubwa jekundu na hawana tabia Yangu. Kwa kuwa wao ni dhuria ya joka kubwa jekundu, wana tabia yake; yaani, wana tabia ya wanyama. Jambo hili ni kweli kabisa, na halibadiliki milele! Hii ni kwa sababu yote yaliamriwa kabla na Mimi. Hakuna anayeweza kulibadilisha (Ninamaanisha, Sitamruhusu mtu yeyote atende kinyume na sheria hii); ukijaribu, Nitakupiga chini!

Mnapaswa kuangalia mafumbo Niliyofichua ili muone ni hatua gani ambayo mpango Wangu wa usimamizi na kazi Yangu imefikia. Tazameni kile Ninachofanya kwa mikono Yangu, tazameni hukumu Yangu iko juu ya nani, na tazameni ni nani ambaye ghadhabu Yangu inamwangukia. Hii ni haki Yangu. Ninaipanga kazi Yangu na Ninausimamia mpango Wangu kulingana na mafumbo Niliyofichua. Hakuna anayeweza kubadilisha hili; lazima lifanywe hatua kwa hatua, kulingana na nia Yangu. Mafumbo ni njia ambayo kazi Yangu inaendelea, na ni ishara zinazoashiria hatua katika mpango Wangu wa usimamizi. Hakuna mtu atakayeruhusiwa kuongeza wala kupunguza chochote kutoka kwa mafumbo Yangu, kwa sababu ikiwa fumbo si sahihi, basi njia si sahihi. Kwa nini Ninawafichulia mafumbo Yangu sasa? Sababu ni ipi? Ni nani miongoni mwenu anayeweza kusema waziwazi? Zaidi ya hayo, Nimesema kwamba mafumbo ni njia, kwa hivyo njia hii inarejelea nini? Ni mchakato mnaopitia kutoka katika mwili wa nyama kuingia katika mwili, na hii ni hatua muhimu. Baada ya Mimi kufichua mafumbo Yangu, dhana za watu zinaondolewa hatua kwa hatua na mawazo yao yanadhoofishwa hatua kwa hatua. Huu ni mchakato wa kuingia katika ulimwengu wa kiroho. Hivyo, Ninasema kwamba kazi Yangu inafanyika kwa hatua, na si ya kufikirika; hili ndilo la vitendo, na hii ndiyo njia Yangu ya kufanya kazi. Hakuna anayeweza kubadilisha hili, wala hakuna mtu mwingine anayeweza kulifanikisha hili, kwa maana Mimi ni Mungu wa kipekee Mwenyewe! Kazi Yangu inafanywa na Mimi binafsi. Ulimwengu dunia mzima unadhibitiwa na Mimi peke Yangu, na kupangwa na Mimi peke Yangu. Ni nani anayethubutu kutonisikiliza? (Kwa “Mimi peke Yangu,” Ninamaanisha Mungu Mwenyewe, kwa sababu mtu Niliye ni Mungu Mwenyewe—kwa hivyo msishikilie sana dhana zenu wenyewe.) Ni nani anayethubutu kwenda kinyume na Mimi? Ataadhibiwa vikali! Mmeona matokeo ya joka kubwa jekundu! Huo ndio mwisho wake, lakini pia ni jambo lisiloepukika. Kazi hii lazima ifanywe na Mimi Mwenyewe ili kuliaibisha joka kubwa jekundu, kulifanya lisiweze kuinuka tena kamwe, na kulisababisha liangamie milele! Sasa Ninaanza kufichua mafumbo. (Kumbukeni! Mengi ya mafumbo yanayofichuliwa ni mambo ambayo ninyi huyatamka mara kwa mara lakini ambayo hakuna anayeyaelewa.) Nimesema kwamba mambo yote ambayo watu wanayaona kama hayajakamilika tayari yamekamilishwa machoni Pangu, na mambo ambayo Ninayaona kama ndiyo yanaanza, yanaonekana kwa watu kuwa tayari yamefanikishwa. Je, hili linakinzana? Halikinzani. Watu wanafikiri kwa namna hiyo kwa sababu wana dhana na mawazo yao wenyewe. Mambo Ninayopanga yanafanikishwa kupitia maneno Yangu. (Ninanena, na yanaanzishwa; Ninanena, na yanatimia.) Hata hivyo, haionekani Kwangu kwamba mambo ambayo Nimesema yamefanikishwa. Hii ni kwa sababu kuna kikomo cha muda kwa mambo Ninayofanya. Hivyo, Ninayaona mambo haya kama ambayo hayajafanikishwa bado, ingawa katika macho ya kimwili ya watu (kwa sababu ya tofauti katika dhana yao ya muda), mambo haya tayari yamefanikishwa. Siku hizi watu wengi wamekuwa na mashaka juu Yangu kwa sababu ya mafumbo ambayo Ninayafichua. Uhalisi unapowajia, na kwa sababu nia Zangu hazilingani na dhana za watu, wanakuwa wenye kunipinga na kunikana. Hii ni Shetani akijinasa katika njama zake mwenyewe. (Wanataka kupokea baraka, lakini hawakutarajia kwamba Mungu asingelingana na dhana zao wenyewe kwa kiwango hicho, kwa hivyo wanarudi nyuma.) Haya pia ni matokeo ya kazi Yangu. Watu wote wanapaswa kunisifu Mimi, kunishangilia Mimi, na kunipa Mimi utukufu. Kila kitu kabisa kiko mikononi Mwangu, na kila kitu kabisa kiko ndani ya hukumu Yangu. Watu Wangu wateule wasiohesabika wanapomiminika kwenye mlima Wangu, na wazaliwa wa kwanza wanaporudi wakiwa washindi, huo utakuwa mwisho wa mpango Wangu wa usimamizi. Utakuwa wakati wa kukamilika kwa mpango Wangu wa usimamizi wa miaka elfu sita. Kila kitu kinapangwa na Mimi binafsi; Nimesema hili tayari mara nyingi. Kwa sababu bado mnaishi ndani ya dhana zenu, lazima Nisisitize hili tena na tena ili msifanye makosa yoyote hapa na kwa sababu ya hilo mvuruge mpango Wangu. Watu hawawezi kunisaidia, wala hawawezi kushiriki katika usimamizi Wangu, kwa sababu ninyi kwa sasa bado ni wa nyama na damu. (Ingawa mmechaguliwa na Mimi, bado mnaishi katika mwili.) Hivyo basi, Ninasema kwamba wale walio wa nyama na damu hawawezi kupokea urithi Wangu. Hii pia ndiyo sababu kuu ya kuwafanya mwingie katika ulimwengu wa kiroho.

Duniani, matetemeko ya ardhi ni mwanzo wa majanga. Kwanza, Ninaifanya dunia—yaani, ardhi—ibadilike, na baadaye huja tauni na njaa. Huu ni mpango Wangu, na hizi ni hatua Zangu, na Nitakidhibiti kila kitu kinihudumie ili kufanikisha mpango Wangu wa usimamizi. Hivyo, bila Mimi kuuharibu, ulimwengu dunia mzima utajiharibu wenyewe. Nilipokuwa mwili kwa mara ya kwanza na kusulubiwa msalabani, ardhi ilitetemeka sana, na itakuwa vivyo hivyo mwisho utakapofika. Matetemeko ya ardhi yataanza wakati hasa Ninapoingia katika ulimwengu wa kiroho kutoka katika mwili. Hivyo, wazaliwa wa kwanza hawatateseka kabisa kutokana na janga, ilhali wale ambao si wazaliwa wa kwanza wataachwa wateseke katikati ya majanga. Kwa hivyo, kutoka katika mtazamo wa binadamu, kila mtu yuko tayari kuwa mzaliwa wa kwanza. Katika jakamoyo za watu, hili si kwa ajili ya kufurahia baraka, bali ni kuepuka mateso ya janga. Hii ni njama ya joka kubwa jekundu. Hata hivyo, Sitaliruhusu kamwe liepuke adhabu; hakika Nitalisababisha lipitie adhabu Yangu kali, na kisha bado lisimame na linihudumie (hii inarejelea kuwafanya wana Wangu na watu Wangu kuwa kamili), na Nitalifanya daima lianguke katika njama zake lenyewe, daima likubali hukumu Yangu, na daima likubali kuchoma Kwangu. Hii ndiyo maana ya kweli ya kuwafanya watoa huduma wanisifu (yaani, kuwatumia kudhihirisha uweza Wangu mkuu). Sitaliruhusu joka kubwa jekundu liingie kwa siri katika ufalme Wangu, wala Sitalipa haki ya kunisifu! (Hii ni kwa sababu halistahili, halistahili milele!) Nitalifanya tu joka kubwa jekundu linihudumie milele! Nitaliacha tu lisujudu mbele Yangu. (Wale wanaoangamia wapo afadhali kuliko wale walio katika upotevu; kuangamia ni aina ya muda tu ya adhabu kali, huku watu walio katika upotevu watapitia adhabu kali milele. Kwa sababu hii, Ninatumia neno “sujudu.” Kwa sababu watu hawa wanaingia kisiri katika nyumba Yangu na wanafurahia neema Yangu nyingi, na wana maarifa kiasi juu Yangu, Ninatumia adhabu kali. Kuhusu wale walio nje ya nyumba Yangu, unaweza kusema kwamba wasiojua hawatateseka.) Katika dhana za watu, wanafikiri kwamba watu wanaoangamia wapo katika hali mbaya zaidi kuliko wale walio katika upotevu, lakini kinyume chake, hawa waliotajwa mwisho wanapaswa kuadhibiwa vikali milele, na wale wanaoangamia watarudi katika hali ya kuwa si kitu kwa umilele wote.

Iliyotangulia: Sura ya 107

Inayofuata: Sura ya 109

Ulimwengu umezongwa na maangamizi katika siku za mwisho. Je, hili linatupa onyo lipi? Na tunawezaje kulindwa na Mungu katikati ya majanga?

Mipangilio

  • Matini
  • Mada

Rangi imara

Mada

Fonti

Ukubwa wa Fonti

Nafasi ya Mstari

Nafasi ya Mstari

Upana wa ukurasa

Yaliyomo

Tafuta

  • Tafuta Katika Maneno Haya
  • Tafuta Katika Kitabu Hiki

Wasiliana nasi kupitia WhatsApp