Katika utendaji, kushika amri kunapaswa kuhusishwa na kutenda ukweli. Akiwa anashika amri, ni lazima mtu atende ukweli. Unapotenda ukweli, hupaswi kwenda kinyume na kanuni za amri, wala kukiuka amri; lazima ufanye chochote ambacho Mungu anataka kutoka kwako. Kushika amri na kutenda ukweli kunahusiana, si matendo yanayokinzana. Kadiri unavyotenda ukweli zaidi, ndivyo unavyokuwa na uwezo zaidi wa kushika kiini cha amri. Kadiri unavyotenda ukweli, ndivyo utakavyozidi kuelewa waziwazi na kufahamu neno la Mungu kama linavyoonyeshwa katika amri. Kutenda ukweli na kushika amri si matendo yanayokinzana—ni matendo yanayohusiana. Hapo mwanzo, ni baada tu ya mwanadamu kushika amri vizuri ndipo angeweza kutenda ukweli na kupokea nuru kutoka kwa Roho Mtakatifu, lakini hii si nia asili ya Mungu. Mungu anakutaka uuweke moyo wako katika kumwabudu Yeye, si tu kuwa na tabia njema. Hata hivyo, lazima ushike amri vizuri, angalau kwa nje. Ni wakati tu mtu anapopata kumjua Mungu vizuri zaidi katika mchakato wa upitiaji wa hatua kwa hatua, bila kumwasi wala kumpinga Yeye, na bila kuwa na shaka yoyote kuhusu kazi Yake, ndipo anaweza kushika kiini cha amri. Na hivyo, kushika amri tu bila kutenda ukweli bado hakuzai matunda, na si ibada ya kweli kwa Mungu, kwa maana bado hujapata kimo halisi. Kushika amri tu bila ukweli ni sawa na kushikilia taratibu bila kubadilika. Kwa kufanya hivyo, amri zingekuwa sheria tu kwako, zisizoweza kukusaidia kukua katika uzima. Kinyume chake, zingekuwa mzigo wako, na kukufunga kwa nguvu kama sheria za Agano la Kale, na kukufanya upoteze uwepo wa Roho Mtakatifu. Kwa hivyo, ni kwa kutenda ukweli tu ndiyo unaweza kuzishika amri vizuri, na kuzishika amri vizuri ni kwa ajili ya kutenda ukweli. Katika mchakato wa kushika amri, utatia hata ukweli mwingi zaidi katika vitendo, na unapokuwa unatenda ukweli, utapata hata ufahamu wa kina zaidi wa kile ambacho amri zinamaanisha hasa. Kusudi na maana ya matakwa ya Mungu kwamba mwanadamu ashike amri si kumfanya mwanadamu afuate taratibu kama anavyoweza kuwazia; badala yake, yanahusiana na kuingia kwake katika uzima. Kiwango cha ukuaji wako katika uzima huamua kiwango ambacho utaweza kushika amri. Ingawa amri zipo kwa ajili ya mwanadamu kuzishika, kiini cha amri kinakuwa wazi tu kupitia uzoefu wa maisha wa mwanadamu. Watu wengi hudhani kwamba kushika amri vizuri kunamaanisha kwamba “wamejitayarisha kikamilifu, na kile tu kinachosalia kufanywa ni kunyakuliwa.” Fikira ya aina hii ni matarajio ya ubadhirifu. Si nia ya Mungu. Ni mazungumzo ya wale wasio na matamanio ya kufanya maendeleo, wale wanaotamani mwili. Ni upotofu! Hailingani na uhalisi! Si nia ya Mungu kutenda ukweli tu bila kushika amri kwa kweli. Wale wanaofanya hivi ni walemavu—kama mtu asiye na mguu. Kushika amri tu kana kwamba unafuata taratibu, lakini huna ukweli—hili haliwezi kuiridhisha nia ya Mungu, pia, kama wale waliokosa jicho—bado ni walemavu. Inaweza kusemwa kwamba ukizishika amri vizuri na kupata uelewa wazi wa Mungu wa vitendo, basi utakuwa na ukweli; kwa kusema kwa ulinganisho, utakuwa umepata kimo halisi. Ukitenda ukweli unaopaswa kutenda, pia utashika amri, na vitu hivi viwili havikinzani. Kutenda ukweli na kushika amri ni mifumo miwili mikuu, yote ambayo ni sehemu za lazima za uzoefu wa maisha wa mtu. Uzoefu wa mtu unapaswa kujumuisha muungano, si mgawanyiko, wa kushika amri na kutenda ukweli. Hata hivyo, kuna tofauti na uhusiano kati ya mambo haya mawili.

Kutangazwa kwa amri katika enzi mpya ni thibitisho la ukweli kwamba watu wote katika mkondo huu, wale wote wanaosikia matamko ya Mungu leo, wameingia katika enzi mpya. Huu ni mwanzo mpya kwa kazi ya Mungu, na pia mwanzo wa sehemu ya mwisho ya kazi ya mpango wa Mungu wa usimamizi wa miaka elfu sita. Amri za enzi mpya zinaashiria kwamba Mungu na mwanadamu wameingia katika ulimwengu wa mbingu mpya na ardhi mpya, na kwamba Mungu, kama vile Yehova alivyofanya kazi miongoni mwa Waisraeli na Yesu alivyofanya kazi miongoni mwa Wayahudi, atafanya kazi ya kivitendo zaidi, na atafanya kazi nyingi zaidi na kubwa zaidi ardhini. Pia zinaashiria kwamba kundi hili la watu litapokea maagizo mengi na makubwa zaidi kutoka kwa Mungu, watakimiwa, watalishwa, watategemezwa, watatunzwa, na watalindwa na Yeye kwa namna ya vitendo, watapokea mafunzo ya vitendo zaidi kutoka Kwake, na watapogolewa, watavunjwa, na watasafishwa na neno la Mungu. Umuhimu wa amri za enzi mpya ni wa kina kweli. Zinadokeza kwamba Mungu ataonekana kwa vitendo duniani, ambapo Ataushinda ulimwengu mzima, akifunua utukufu Wake wote katika mwili. Pia zinadokeza kwamba Mungu wa vitendo atafanya kazi ya kivitendo zaidi duniani ili kuwafanya wateule Wake wote kuwa watimilifu. Zaidi ya hayo, Mungu atatimiza kila kitu duniani kwa maneno, na kutimiza uhalisi kwamba “Mungu aliyefanyika mwili atainuka hadi juu kabisa na kutukuzwa kama mkuu, na mataifa na watu wasiohesabika watapiga magoti kumwabudu Mungu, ambaye anatukuzwa kama mkuu.” Ingawa amri za enzi mpya ni kwa ajili ya mwanadamu kushika, na ingawa kufanya hivyo ni wajibu wa mwanadamu na kile ambacho mwanadamu anapaswa kufikia, maana ambayo zinawakilisha ni ya kina sana kuweza kuelezwa kikamilifu kwa neno moja au mawili. Amri za enzi mpya zinachukua nafasi ya sheria za Agano la Kale na maagizo ya Agano Jipya kama yalivyotangazwa na Yehova na Yesu. Hili ni funzo la kina zaidi, si jambo rahisi kama watu wanavyoweza kuwazia. Kuna kipengele cha umuhimu wa vitendo kwa amri za enzi mpya. Hizo ndizo hatua ya mpito kati ya Enzi ya Neema na Enzi ya Ufalme. Amri za enzi mpya zinakomesha matendo na maagizo yote ya enzi ya zamani—zikikomesha matendo yote kutoka enzi ya Yesu na yale ya kabla ya enzi hiyo. Zinamleta mwanadamu katika uwepo wa Mungu wa vitendo zaidi, ili aweze kuanza kukubali kufanywa mtimilifu na Yeye binafsi; hizo ndizo mwanzo wa njia ya ukamilifu. Hivyo, mnapaswa kuwa na mtazamo sahihi kuhusiana na amri za enzi mpya, na wala msizichukulie kwa uzembe wala msizichukulie kwa urahisi. Amri za enzi mpya zinatilia mkazo mkubwa kwenye jambo fulani: Kwamba mwanadamu atamwabudu Mungu wa vitendo Mwenyewe wa leo, jambo ambalo linahusisha kutii kiini cha Roho kwa njia ya vitendo zaidi. Amri pia zinasisitiza kanuni ambayo kwayo Mungu atamhukumu mwanadamu kuwa mwenye dhambi au mwenye haki baada ya Yeye kuonekana kama Jua la haki. Amri ni rahisi kuzielewa kuliko kuzitia katika vitendo. Kutokana na hili inaweza kuonekana kwamba Mungu akitaka kumkamilisha mwanadamu, basi lazima Afanye hivyo kupitia maneno na mwongozo Wake Mwenyewe, na mwanadamu hawezi kufikia utimilifu kwa njia ya akili yake mwenyewe ya asili pekee. Iwapo mwanadamu anaweza kushika amri za enzi mpya au la kunahusiana na maarifa yake ya Mungu wa vitendo. Hivyo, kufuata kwako amri hakuwezi kufikiwa kwa siku chache tu. Hili ni funzo la kina sana la kujifunza.

Utendaji wa ukweli ni njia ambayo kwayo uzima wa mwanadamu unaweza kukua. Msipotenda ukweli, basi mtabaki na nadharia tu na hamtakuwa na uzima halisi. Ukweli ni ishara ya kimo cha mwanadamu, na iwapo unatenda ukweli au la kunahusiana na iwapo una kimo halisi au la. Ukikosa kutenda ukweli, usipotenda kwa haki, au ushawishiwe na hisia na kujali mwili, basi kushika amri hakuwezekani. Hili ndilo funzo la kina kabisa. Katika kila enzi, kuna ukweli mwingi ambao watu wanahitaji kuuingia na wanahitaji kuuelewa, lakini pia katika kila enzi, kuna amri tofauti zinazoambatana na ukweli huo. Ukweli ambao watu hutenda unahusiana na enzi mahususi, na ndivyo ilivyo kwa amri wanazoshika. Kila enzi ina ukweli wake wa kutendwa na zaidi ya hayo, amri zake za kushikwa. Hata hivyo, kulingana na amri zilizotangazwa na Mungu—yaani, kulingana na enzi tofauti—lengo na matokeo ya kutenda ukweli kwa mwanadamu pia hutofautiana. Inaweza kusemwa kwamba amri hutumikia ukweli, na ukweli upo ili kudumisha amri. Kukiwa na ukweli tu, basi hakutakuwa na mabadiliko ya kutajika katika kazi ya Mungu. Hata hivyo, kwa kurejelea amri, mwanadamu anaweza kutambua kiwango cha mwelekeo katika kazi ya Roho Mtakatifu, na mwanadamu anaweza kujua enzi ambamo Mungu anafanya kazi. Katika dini, kuna watu wengi ambao wanaweza kutenda ukweli mwingi uliotendwa na watu katika Enzi ya Sheria. Hata hivyo, bado hawajapokea amri za enzi mpya, wala hawawezi kuzishika. Bado wanazifuata njia za zamani na wanabaki kama wanadamu wa asili. Hawaambatani na mbinu mpya za kazi na hawawezi kuona amri za enzi mpya. Hivyo, hawana kazi ya Mungu. Ni kana kwamba wanalinda maganda matupu ya mayai; ikiwa hakuna kifaranga ndani, basi hakuna roho. Kusema kwa usahihi zaidi, inamaanisha hawana uzima. Watu kama hao bado hawajaingia katika enzi mpya na wamebaki nyuma kwa hatua nyingi. Kwa hivyo, kuwa na ukweli wa enzi zilizopita tu bila amri za enzi mpya ni bure. Wengi wenu mnatenda ukweli wa leo lakini hamshiki amri za leo. Hamtapata chochote, na ukweli mnaotenda hautakuwa na thamani na hautakuwa na maana na Mungu hatawakubali. Kutenda ukweli lazima kufanywe ndani ya vigezo vya mbinu za kazi ya wakati wa sasa ya Roho Mtakatifu; lazima kufanywe kwa kuitikia matamko ya Mungu wa vitendo leo. Bila kufanya hivyo, kila kitu ni batili, ni sawa na kujaribu kuteka maji kwa kutumia kikapu cha mianzi. Hii pia ni maana ya vitendo ya kutangazwa kwa amri za enzi mpya. Ili watu washike amri vizuri, angalau wanapaswa kumjua Mungu anayeonekana kwa vitendo katika mwili, na wasichanganyikiwe kumhusu Yeye. Yaani, watu wanapaswa kuelewa kanuni za kushika amri vizuri. Kushika amri hakumaanishi kuzifuata kiholela au jinsi wapendavyo, bali kuzishika kwa msingi, kwa lengo, na kwa kanuni. Jambo la kwanza kufikiwa ni wewe kuyaelewa maono waziwazi. Ukiwa na uelewa wa kina kuhusu kazi ya Roho Mtakatifu katika wakati wa sasa, na ikiwa unaingia katika mbinu za kazi za leo, basi bila shaka utapata uelewa wazi wa kushika amri. Siku ikifika ambapo utang’amua kiini cha amri za enzi mpya na unaweza kushika amri, basi utakuwa umekamilishwa. Huu ndio umuhimu wa vitendo wa kutenda ukweli na kushika amri. Iwapo unaweza kutenda ukweli au la kunategemea jinsi unavyokichukulia kiini cha amri za enzi mpya. Kazi ya Roho Mtakatifu itaendelea kumwonekania mwanadamu, na matakwa ya Mungu kwa mwanadamu yatazidi kuwa ya juu hatua kwa hatua. Kwa hivyo, ukweli ambao Mungu anawataka watu watende utaongezeka zaidi na zaidi kwa idadi na kuwa wa juu hata zaidi, na matokeo ya kushika amri yatazidi kuwa makuu. Kwa hivyo, ni lazima mtende ukweli na wakati huo huo mshike amri. Hakuna mtu anayepaswa kupuuza jambo hili; acha ukweli mpya na amri mpya vianze wakati huo huo katika enzi hii mpya.