Watu wanahisi kwamba wanaweza tu kubadilika ndani ya maisha ya kanisa, na kwamba ikiwa hawako ndani ya maisha ya kanisa, hawawezi kubadilika, kana kwamba mabadiliko hayawezi kufikiwa katika maisha halisi. Je, mnaweza kuona tatizo katika jambo hili? Nimezungumza kuhusu kumleta Mungu katika maisha halisi hapo awali; kwa wale wanaomwamini Mungu, hii ndiyo njia ya kuingia katika uhalisi wa maneno ya Mungu. Kwa kweli, maisha ya kanisa ni namna moja tu yenye kikomo ya kuwafanya watu kuwa watimilifu. Mazingira ya kimsingi ya kuwafanya watu kuwa watimilifu bado ni maisha halisi. Hili ndilo zoezi halisi na mafunzo halisi Niliyoyazungumzia, ambayo huwawezesha watu kufikia maisha ya ubinadamu wa kawaida na kuishi kwa kudhihirisha mfano wa mtu wa kweli katika maisha ya kila siku. Kwanza, mtu lazima asome ili ainue kiwango chake mwenyewe cha elimu, aelewe maneno ya Mungu, na afikie uwezo wa kufahamu. Pili, mtu lazima awe na maarifa ya msingi ya kujiendesha, na afikie umaizi na busara ya ubinadamu wa kawaida, kwa sababu watu wanakosa karibu kabisa mambo haya. Zaidi ya hayo, mtu lazima pia afikie kuyafurahia maneno ya Mungu kupitia maisha ya kanisa, na hatua kwa hatua afikie kuwa na uelewa wazi wa ukweli.

Kwa nini inasemwa kwamba katika kumwamini Mungu, mtu lazima amlete Mungu katika maisha halisi? Si tu maisha ya kanisa yanayowabadilisha watu; muhimu zaidi, maisha halisi yanawawezesha watu kuingia katika uhalisi. Mlikuwa daima mkizungumza kuhusu hali yenu ya kiroho na mambo ya kiroho lakini ilipohusu mambo mengi katika maisha halisi, mlitilia maanani kidogo sana mazoezi na kuingia. Mliandika kila siku, mlisikiliza kila siku, na mlisoma kila siku. Hata mliomba huku mkipika, “Mungu! Wewe uwe uzima wangu ndani yangu. Tafadhali nibariki na kunitia nuru kuhusu jinsi ninavyopaswa kuipitia leo. Chochote Unachonitia nuru kukihusu leo, tafadhali niruhusu nikielewe wakati huu, ili maneno Yako yaweze kuwa uzima wangu.” Pia uliomba ulipokuwa ukila chajio, “Mungu! Umetupatia chakula hiki. Utubariki. Amina! Tuishi kwa kukutegemea Wewe. Uwe pamoja nasi. Amina!” Baada ya kumaliza chajio chako na ulipokuwa ukiosha vyombo, ulianza kujisemeasemea, “Mungu, mimi ni bakuli hili. Tumepotoshwa na Shetani na tuko tu kama mabakuli ambayo yametumika na lazima yasafishwe kwa maji. Wewe ni maji, na maneno Yako ni maji ya uzima ambayo yanakimu uzima wangu.” Muda si muda, ulikuwa wakati wa kulala, na ulianza kujisemeasemea tena, “Mungu! Wewe umenibariki na kunielekeza mchana kutwa. Kweli ninakushukuru Wewe. …” Hivi ndivyo ulivyopitisha siku yako, na kisha ukaingia katika usingizi wako. Watu wengi kabisa wanaishi hivi kila siku, na hata sasa wanapuuza kuingia halisi, wakizingatia tu kusema maneno matupu katika maombi yao. Haya ni maisha yao ya awali—maisha yao ya zamani. Na wengi wako hivi; wanakosa mazoezi yoyote halisi, na wanapitia mabadiliko machache sana ya kweli. Wanasema maneno matupu tu katika maombi yao, wakimkaribia Mungu katika maneno yao pekee, huku uelewa wao hauzidi kuwa na kina hata kidogo. Hebu tuchukue mfano rahisi kabisa—kupanga nyumba yako. Unaona kwamba nyumba yako ni chafu, kwa hivyo unaketi hapo na kuomba, “Mungu! Tazama jinsi Shetani amenipotosha kwa kina. Mimi ni mchafu tu kama nyumba hii. Mungu! Kweli ninakusifu na kukushukuru Wewe. Bila wokovu Wako na nuru Yako, nisingeutambua ukweli huu.” Unaketi tu hapo na kujisemeasemea, ukiomba kwa muda mrefu, na baadaye unatenda kana kwamba hakuna kitu ambacho kimetokea, kana kwamba wewe ni mwanamke mzee anayejisemeasemea. Unapitisha maisha yako ya kiroho kwa namna hii bila kuingia katika uhalisi wowote wa kweli hata kidogo, ukiwa na matendo mengi sana ya kijuujuu! Kuingia katika mazoezi ya maisha halisi kunahusisha maisha halisi ya watu na matatizo yao halisi ya maisha—hii ndiyo namna pekee inayoweza kuwabadilisha. Bila maisha halisi, watu hawawezi kubadilishwa. Kusema maneno matupu tu katika maombi kuna manufaa gani? Bila kuelewa asili ya mwanadamu, ni kupoteza wakati bure, na bila njia ya utendaji, ni juhudi za bure hata zaidi! Maombi ya kawaida yanaweza kuwasaidia watu kudumisha hali yao ya kawaida ndani, lakini hayawezi kuwabadilisha kabisa. Kujua kujihesabia haki kwa mwanadamu, kiburi, kujiona, majivuno, na kujua tabia potovu za mwanadamu—maarifa ya mambo haya hayaji kupitia maombi—yanagunduliwa kwa kuyafurahia maneno ya Mungu, na yanajulikana kupitia kutiwa nuru na Roho Mtakatifu katika maisha halisi. Watu siku hizi wote wanaweza kuzungumza vizuri sana, na wamesikiliza mahubiri ya juu zaidi—ya juu zaidi kuliko mengine yoyote katika enzi na vizazi vyote—lakini machache sana kati ya hayo yanatekelezwa kwa kweli katika maisha yao halisi. Yaani, hakuna Mungu katika maisha yao halisi; hawaishi maisha ya mtu mpya baada ya mabadiliko. Hawaishi kwa kudhihirisha ukweli katika maisha halisi, wala hawamleti Mungu katika maisha halisi. Wanaishi kama wana wa jahanamu. Je, huu si mkengeuko wazi?

Ili kurejesha mfano wa mtu wa kawaida, yaani, kufikia ubinadamu wa kawaida, watu hawawezi tu kumpendeza Mungu kwa maneno yao. Wanajidhuru wenyewe tu kwa kufanya hivyo, na hakunufaishi kuingia kwao wala mabadiliko yao. Kwa hivyo, ili kufikia mabadiliko, watu lazima wajizoeze kidogo kidogo. Lazima waingie polepole, watafute na wachunguze hatua kwa hatua, waingie kutoka katika upande chanya, na waishi maisha ya vitendo ya ukweli; maisha ya mtakatifu. Katika siku zijazo, mambo halisi, matukio halisi, na mazingira halisi yatawawezesha watu kuwa na mazoezi halisi. Watu hawahitajiki kusema mambo kwa maneno tu; badala yake, wanapaswa kujizoeza kupitia mazingira halisi. Kwanza watu huja kutambua kwamba wana ubora duni wa tabia, na kisha hula na kunywa maneno ya Mungu kwa kawaida, na vilevile huingia na kujizoeza kwa kawaida; ni kwa namna hii tu ndiyo wanaweza kuwa na uhalisi, na hivi ndivyo kuingia kunavyoweza kutokea kwa haraka zaidi. Ili kuwabadilisha watu, lazima kuwe na kipengele fulani cha uhalisi; lazima wajizoeze kupitia mambo halisi, matukio halisi, na mazingira halisi. Je, mtu anaweza kufikia mazoezi ya kweli kwa kutegemea maisha ya kanisa pekee? Je, watu wanaweza kuingia katika uhalisi kwa namna hii? Hapana! Ikiwa watu hawawezi kuingia katika maisha halisi, basi hawawezi kuubadilisha mtindo wao wa zamani wa maisha na namna zao za kufanya mambo. Hili halisababishwi kikamilifu na uvivu wa watu wala kiwango cha juu cha utegemezi, bali ni kwa sababu watu hawana kabisa uwezo wa kuishi, sembuse kuelewa ni kiwango gani hasa cha mfano wa mtu wa kawaida ambacho Mungu anawataka watu wafikie. Hapo zamani, watu daima walikuwa wakizungumza, wakisema, wakifanya ushirika—na hata wakawa “watoa hotuba”—lakini hakuna hata mmoja wao aliyefuatilia mabadiliko katika tabia yao ya uzima; badala yake, waliendelea kufuatilia nadharia za kina. Hivyo, katika wakati wa sasa, watu lazima waubadilishe mtindo huu wa kidini wa kumwamini Mungu katika maisha yao. Lazima waingie na wajizoeze kwa kuzingatia tukio moja, jambo moja, mtu mmoja. Lazima wafanye hivyo kwa umakini—ni hapo tu ndipo wanaweza kupata matokeo. Ili watu wabadilishwe, lazima wabadilike katika kiini. Kazi lazima ilenge kiini cha watu, jinsi wanavyoishi, na uvivu wao, utegemezi wao, na hulka yao ya kitumwa—ni kwa namna hii tu ndiyo wanaweza kubadilishwa.

Hata ingawa maisha ya kanisa yanaweza kuleta matokeo katika baadhi ya mambo, jambo la msingi bado ni kwamba maisha halisi yanaweza kuwabadilisha watu. Asili ya zamani ya mtu haiwezi kubadilishwa bila maisha halisi. Hebu tuchukue, kwa mfano, kazi ya Yesu wakati wa Enzi ya Neema. Yesu alipofutilia mbali sheria za awali na kuanzisha amri za enzi mpya, Alinena akitumia mifano halisi kutoka katika maisha halisi. Yesu alipokuwa akiwaongoza wanafunzi Wake kupitia shamba la ngano siku ya Sabato, wanafunzi Wake walihisi njaa na wakachuma masuke ya nafaka ili wale. Mafarisayo waliona hili na wakasema kwamba hawakuwa wakishika siku ya Sabato. Pia walisema kwamba watu hawakuruhusiwa kumwokoa ndama ambaye alikuwa ametumbukia shimoni siku ya Sabato, wakisema kwamba kufanya kazi yoyote hakukuruhusiwa wakati wa Sabato. Yesu alitaja matukio haya ili kutangaza hatua kwa hatua amri za enzi mpya. Wakati huo, Alitumia mambo mengi halisi kuwasaidia watu kuelewa na kubadilika. Hii ndiyo kanuni ambayo kwayo Roho Mtakatifu hufanya kazi Yake, na ndiyo namna pekee inayoweza kuwabadilisha watu. Ikiwa hakuna mambo halisi, na watu wanapata tu uelewa wa mafundisho na wanaweza tu kuelewa mambo kiakili, basi hii si namna yenye matokeo ya kuwabadilisha watu. Kuhusu kupata hekima na umaizi kupitia mazoezi, hilo linatokeaje? Je, watu wanaweza kupata hekima na umaizi kwa kusikiliza, kusoma, na kujaribu tu kuelewa mambo fulani? Hili linawezekanaje? Watu lazima waelewe na wapitie katika maisha halisi! Kwa hivyo, mtu lazima ajizoeze, na mtu hapaswi kujitenga na maisha halisi. Watu lazima watilie maanani vipengele tofauti na waingie katika vipengele mbalimbali: kiwango cha elimu, uwezo wa kujieleza, uwezo wa kuona mambo, utambuzi, uwezo wa kufahamu maneno ya Mungu, akili ya kawaida na kanuni za ubinadamu, na mambo mengine yanayohusiana na ubinadamu ambayo watu lazima wawe nayo. Baada ya uelewa kufikiwa, watu lazima wazingatie kuingia, na ni hapo tu ndipo mabadiliko yanaweza kufikiwa. Ikiwa mtu amefikia uelewa, lakini anapuuza utendaji, je, mabadiliko yanawezaje kutokea? Katika wakati wa sasa, watu wanaelewa mengi, lakini katika uhalisi hawajayaishi kwa kudhihirisha; hivyo, wana uelewa mdogo wa kiini cha maneno ya Mungu. Umetiwa nuru kidogo tu; umepokea mwangaza kidogo kutoka kwa Roho Mtakatifu, lakini hujaingia katika maisha halisi hata kidogo—au huenda hata hujali kuhusu kuingia—hivyo hupitii mabadiliko mengi. Baada ya muda mrefu kama huo, watu wanaelewa mengi. Wanaweza kuzungumza mengi kuhusu maarifa yao ya mafundisho, lakini tabia yao ya nje inabaki vilevile, na ubora wao wa tabia wa asili unabaki kama ulivyokuwa, bila kuendelea hata kidogo. Ikiwa hali ni hii, hatimaye utaingia lini?

Maisha ya kanisa ni aina tu ya maisha ambayo watu wanakusanyika kuyafurahia maneno ya Mungu, na yanachukua sehemu ndogo tu ya maisha ya mtu. Ikiwa maisha halisi ya watu yangeweza pia kuwa kama maisha yao ya kanisa—ikiwa ni pamoja na maisha ya kawaida ya kiroho, kuyafurahia maneno ya Mungu kwa kawaida, kuomba na kuwa karibu na Mungu kwa kawaida, kuishi maisha halisi ambamo kila kitu kinatekelezwa kulingana na nia za Mungu, kuishi maisha halisi ambamo kila kitu kinatekelezwa kulingana na ukweli, kuishi maisha halisi ya kujizoeza kuomba na kujizoeza kuwa watulivu mbele za Mungu, ya kujizoeza kuimba nyimbo za sifa na kucheza dansi—basi hii ndiyo aina pekee ya maisha ambayo ingewaleta katika maisha ya maneno ya Mungu. Watu wengi huzingatia tu hali yao wakati wa saa kadhaa za maisha yao ya kanisa bila “kujali” maisha yao yaliyo nje ya saa hizo, kana kwamba hayawahusu. Pia kuna watu wengi ambao huingia tu katika maisha ya watakatifu wanapokula na kunywa maneno ya Mungu, wanapoimba nyimbo za sifa, au wanapoomba, na kisha wanarudia hali zao za zamani nje ya nyakati hizo. Kuishi hivi hakuwezi kuwabadilisha watu hata kidogo, sembuse kuwafanya wamjue Mungu. Katika kumwamini Mungu, watu wakitamani mabadiliko ya tabia yao, basi lazima wasijitenge na maisha halisi. Katika maisha halisi, lazima ujijue mwenyewe, ujiasi mwenyewe, utende ukweli, na vilevile ujifunze kanuni, maarifa ya kawaida, na taratibu za mwenendo wa kibinafsi katika mambo yote kabla hujaweza kufikia mabadiliko ya hatua kwa hatua. Ukizingatia tu maarifa ya mafundisho na ukiishi tu maisha ya ibada za kidini bila kuingia kwa kina katika uhalisi, bila kuingia katika maisha halisi, basi hutaingia kamwe katika uhalisi, hutawahi kujijua mwenyewe, kujua ukweli, wala kumjua Mungu, na utakuwa kipofu na mjinga milele. Kazi ya Mungu ya kuwaokoa watu si kuwawezesha kuishi maisha ya kawaida ya binadamu ndani ya muda mfupi, wala si kubadilisha dhana na mafundisho yao potofu. Badala yake, kusudi Lake ni kubadilisha tabia za zamani za watu, kubadilisha maisha yao yote ya zamani, na kubadilisha fikira zao zote zilizopitwa na wakati na mtazamo wao wa kiakili. Kuzingatia tu maisha ya kanisa hakutabadilisha mazoea ya zamani ya maisha ya watu wala kubadilisha njia za zamani ambazo wamezifuata kwa muda mrefu. Kwa vyovyote vile, watu hawapaswi kujitenga na maisha halisi. Mungu anataka kwamba watu waishi kwa kudhihirisha ubinadamu wa kawaida katika maisha halisi, si tu katika maisha ya kanisa; kwamba waishi kwa kudhihirisha ukweli katika maisha halisi, si tu katika maisha ya kanisa; na kwamba watimize majukumu yao katika maisha halisi, si tu katika maisha ya kanisa. Ili kuingia katika uhalisi, mtu lazima aelekeze kila kitu kwenye maisha halisi. Ikiwa, katika kumwamini Mungu, watu hawawezi kuja kujijua kupitia kuingia katika maisha halisi, na ikiwa hawawezi kuishi kwa kudhihirisha ubinadamu wa kawaida katika maisha halisi, basi watakuwa walioshindwa. Wale wanaoasi dhidi ya Mungu wote ni watu ambao hawawezi kuingia katika maisha halisi. Wote ni watu wanaozungumza kuhusu ubinadamu, lakini wanaishi kwa kudhihirisha asili ya mapepo. Wote ni watu wanaozungumza kuhusu ukweli, lakini badala yake wanaishi kwa kudhihirisha mafundisho. Wale wasioweza kuishi kwa kudhihirisha ukweli katika maisha halisi ndio wale wanaomwamini Mungu, lakini wanabeuliwa na Yeye. Lazima ujizoeze kuingia kwako katika maisha halisi, ujue mapungufu, uasi, na upumbavu wako mwenyewe, na ujue ubinadamu wako usio wa kawaida na udhaifu wako. Kwa namna hiyo, maarifa yako yataunganishwa katika hali na matatizo yako halisi. Ni maarifa ya aina hii pekee ndiyo ya kweli na yanaweza kukuwezesha kweli kuelewa hali yako mwenyewe na kufikia mabadiliko ya tabia.

Sasa kwa kuwa kazi ya kuwafanya watu kuwa watimilifu imeanza rasmi, lazima uingie katika maisha halisi. Kwa hivyo, ili kufikia mabadiliko, lazima uanze kwa kuingia katika maisha halisi, na ubadilike kidogo kidogo. Ukifutilia mbali maisha ya kawaida ya binadamu na kuzungumza tu kuhusu mambo ya kiroho, basi mambo yanakuwa makavu na ya kuchosha; yanakuwa yasiyo halisi, na kisha watu wanawezaje kubadilika? Sasa unaambiwa uingie katika maisha halisi ili ujifunze, na haya yote ni ili kuweka msingi wa kuingia katika uzoefu wa vitendo. Hiki ni kipengele kimoja cha kile ambacho watu lazima wafanye. Kazi ya Roho Mtakatifu hasa ni kuongoza njia, huku yaliyobaki yakitegemea mazoezi na kuingia kwa watu. Kila mtu lazima afuate njia tofauti za kuingia ili kufikia kuingia katika maisha halisi na kumleta Mungu katika maisha yake halisi, na kuishi kwa kudhihirisha ubinadamu halisi wa kawaida. Hii ndiyo aina pekee ya maisha yenye maana!